Reka sendiherra Frakklands úr landi og líta til Rússlands

Hvorki herstjórnin né sendiráð Frakklands hefur viljað veita blaðamönnum AP fréttaveitunnar upplýsingar um ástæðu þess að sendiherranum hefur verið vikið úr landi.

Frakkar hafa verið með hersveitir í vesturhluta Sahel-svæðisins svokallaða frá 2013 en vígamönnum á vegum Al-Qaeda og Íslamska ríkisins hefur vaxið mikið ásmegin þar. Þúsundir hafa látið lífið í átökum á svæðinu og nærri því tvær milljónir íbúa Búrkína Fasó hafa þurft að flýja heimili sín vegna átakanna.

Sahel-svæðið er þurrt svæði suður af Shara-eyðimörkinni. Valdarán í Malí, Tjad og Búrkína Faso eru sögð hafa grafið undan samskiptum Frakka við þau ríki og gefið vígamönnum á Sahel-svæðinu byr undir báða vængi.

Aukin umsvif Rússa

Franskir hermenn fóru frá Malí í fyrra eftir að samband ríkjanna versnaði verulega í kjölfar valdaráns hersins og aukinna umsvifa Rússa í Malí. Hundruð franskra hermanna halda þó enn til í Búrkína Fasó.

Sjá einnig: Flytja alla hermenn frá Malí vegna versnandi samskipta við herstjórnina

Núverandi herstjórn Búrkína Fasó tók völdin af annarri herstjórn í fyrra og var valdaránið réttlætt með því að fyrrverandi herstjórnin hefði ekki gert nóg til að binda enda á átökin í landinu. Það var einmitt sama ástæða og fyrri herstjórnin gaf þegar hún tók völdin af ríkisstjórn landsins nokkrum mánuðum áður.

Sjá einnig: Herinn rænir völdum í Búrkína Fasó

AP segir að árásum vígamanna hafi fjölgað og umfang þeirra aukist frá því herstjórnin tók völdin í Búrkína Fasó. Vígamenn hafa meðal annars setið um heilu bæina og hafa sérfræðingar áhyggjur af því að tugir þúsunda eigi hættu á því að lenda í hungursneyð.

AP hefur eftir sérfræðingi í málefnum Vestur-Afríku að ákvörðun herstjórnarinnar muni mögulega leiða til deilna við önnur ríki á svæðinu þar sem stefnan sé sett á aukið lýðræði.

Sakaðir um glæpi og ódæði

Rússar hafa sent málaliða á vegum Wagner Group til Malí og Búrkína Fasó. Málaliðahópurinn er í eigu rússneska auðjöfursins Yevgeny Prigozhin en sá hefur lengi verið kallaður „kokkur Pútíns“ vegna náinna tengsla hans við forseta Rússlands. Hann stofnaði málaliðahópinn eftir innrás Rússa í Úkraínu árið 2014 en hópnum hefur verið lýst sem „skuggaher Rússlands“ og hafa málaliðar á vegum Wagner verið virkir í Afríku, Mið-Austurlöndum og í Úkraínu.

Málaliðar Wagner hafa víða verið sakaðir um grimmileg brot. Evrópusambandið beitti Wagner Group og menn sem að málaliðahópnum koma refsiaðgerðum í fyrra. Sambandið sagði málaliða Wagner hafa brotið gegn mannréttindum fólks og framið ýmis brot eins og pyntingar, aftökur og ógnanir gegn óbreyttum borgurum.