Ómar Ingi íþróttamaður ársins annað árið í röð

Hjörtur Leó Guðjónsson og Ingvi Þór Sæmundsson skrifa 29. desember 2022 20:45

Ómar Ingi Magnússon er íþróttamaður ársins annað árið í röð. Kolektiff Images/DeFodi Images via Getty Images

Ómar Ingi Magnússon, leikmaður Magdeburg og íslenska handboltalandsliðsins, var kjörinn Íþróttamaður ársins 2022, af Samtökum íþróttafréttamanna. Þetta er annað árið í röð sem Ómar hlýtur þessa nafnbót. Selfyssingurinn var með sögulega yfirburði í kjörinu í ár.

Ómar fékk 615 atkvæði og var efstur á þrjátíu af 31 atkvæðaseðli í ár. Það munaði því aðeins fimm stigum að Ómar ynni með fullu húsi.

Í 2. sæti í kjörinu varð Glódís Perla Viggósdóttir, leikmaður Bayern München og íslenska fótboltalandsliðsins. Hún fékk 276 atkvæði, þremur atkvæðum meira en handboltamaðurinn Gísli Þorgeir Kristjánsson sem varð í 3. sæti í kjörinu.

Alls munaði 339 atkvæðum á Ómari og Glódísi en aldrei í 68 ára sögu kjörsins hefur munað meiru á Íþróttamanni ársins og þeim sem endar í 2. sæti.

Ómar Ingi tekur við verðlaununum.Vísir/Hulda Margrét

Ómar átti magnað ár með Magdeburg og íslenska landsliðinu. Hann varð þýskur meistari og heimsmeistari félagsliða með Magdeburg og var markakóngur EM þar sem Ísland endaði í 6. sæti. Ómar var valinn besti leikmaður þýsku úrvalsdeildarinnar og var næstmarkahæsti leikmaður hennar.

Kylfingurinn Guðmundur Ágúst Kristjánsson var í 4. sæti í kjörinu í ár og sundmaðurinn Anton Sveinn McKee í því fimmta.

Íþróttamaður ársins 2022 – stigin

1.Ómar Ingi Magnússon, handknattleikur – 615

2.Glódís Perla Viggósdóttir, knattspyrna – 276

3.Gísli Þorgeir Kristjánsson, handknattleikur – 273

4.Guðmundur Ágúst Kristjánsson, golf – 172

5.Anton Sveinn McKee, sund – 164

6.Sandra Sigurðardóttir, fótbolti – 136

7.Elvar Már Friðriksson, körfubolti – 85

8.Kristín Þórhallsdóttir, kraftlyftingar – 73

9.Tryggvi Snær Hlinason, körfubolti – 65

10.Viktor Gísli Hallgrímsson, handbolti – 62

Hilmar Örn Jónsson, frjálsíþróttir – 62

12. Sveindís Jane Jónsdóttir, fótbolti – 50

13. Snorri Einarsson, skíði – 43

Perla Sól Sigurbrandsdóttir, golf – 43

15. Bjarki Már Elísson, handbolti – 30

16. Hákon Arnar Haraldsson, fótbolti – 26

17. Dagný Brynjarsdóttir, fótbolti – 24

18. Guðni Valur Guðnason, frjálsíþróttir – 19

19. Thelma Aðalsteinsdóttir, fimleikar – 9

Sóley Margrét Jónsdóttir, kraftlyftingar – 9

21. Thelma Björg Björnsdóttir, íþróttir fatlaðra – 6

22. Hilmar Snær Örvarsson, íþróttir fatlaðra – 5

Guðlaug Edda Hannesdóttir, þríþraut – 5

Eygló Fanndal Sturludóttir, lyftingar – 5

25. Jóhann Berg Guðmundsson, fótbolti – 3

26. Valgarð Reinhardsson, fimleikar – 2

27. Guðrún Brá Björgvinsdóttir, golf – 1

Ómar er aðeins annar handboltamaðurinn til að hreppa titilinn íþróttamaður ársins oftar en einu sinni. Ólafur Stefánsson hlaut nafnbótina fjórum sinnum (2002, 2003, 2008, 2009).

Þetta er í fjórtánda sinn sem handboltamaður er íþróttamaður ársins. Sigríður Sigurðardóttir vann fyrst (1964) svo hafa það verið Geir Hallsteinsson (1968), Hjalti Einarsson (1971), Alfreð Gíslason (1989), Geir Sveinsson (1997), Ólafur Stefánsson (2002, 2003, 2008 og 2009), Guðjón Valur Sigurðsson (2006), Alexander Petersson (2010), Aron Pálmarsson (2012) og Ómar Ingi Magnússon (2021 og 2022).

Alls 31 íþróttafréttamaður tók þátt í kjörinu í ár og raðaði hver um sig íþróttafólki á sinn lista í sæti 1-10. Fyrir 1. sæti fengust tuttugu stig, fyrir 2. sæti fengust fimmtán stig og fyrir 3. sæti tíu. Fjórða sætið gaf sjö stig, 5. sætið sex stig og svo koll af kolli.

Íþróttamaður ársins Þýski handboltinn

Tengdar fréttir

Mest lesið

Fleiri fréttir