Íslenski boltinn

FIFA deilir mörkum Dags: „Nei, þið sjáið ekki tvöfalt“

Sindri Sverrisson skrifar
Dagur Dan Þórhallsson var frábær með liði Breiðabliks á nýafstöðnu tímabili.
Dagur Dan Þórhallsson var frábær með liði Breiðabliks á nýafstöðnu tímabili. vísir/Diego

Dagur Dan Þórhallsson skoraði merkilega aukaspyrnutvennu fyrir Íslandsmeistara Breiðabliks gegn Val, í blíðviðri á Hlíðarenda, í næstsíðustu umferð Bestu deildarinnar í fótbolta. FIFA hefur nú dreift myndbandi af mörkunum.

Dagur skoraði raunar þrennu í leiknum, í 5-2 sigri Breiðabliks í bráðfjörugum leik. Tvö markanna komu úr aukaspyrnum af nákvæmlega sama stað, við vítateigsboga Valsmanna, og í bæði skiptin skoraði Dagur yfir varnarvegginn og efst í vinstra hornið, framhjá markverðinum öfluga Frederik Schram.

Á opinbera FIFA World Cup Twitter-reikningnum, sem er með yfir 9,8 milljónir fylgjenda, hefur nú verið birt myndband þar sem hægt er að horfa á bæði mörkin í einu, og sjá hversu ótrúlega lík þau eru.

„Nei, þið sjáið ekki tvöfalt. Þessi leikmaður Breiðabliks skoraði úr tveimur alveg eins aukaspyrnum í sama leiknum,“ er skrifað í færslunni með myndbandinu, færslu sem tugir manna hafa dreift og þar á meðal Dagur sjálfur.

Dagur skoraði alls níu mörk í Bestu deildinni í sumar og var meðal annars valinn í úrvalslið mótsins hjá Stúkunni á Stöð 2 Sport, auk þess að verða meðal fimm efstu í vali leikmanna deildarinnar á besta leikmanni tímabilsins.




Fleiri fréttir

Sjá meira


×