Einkunnir Íslands: Dagný Brynjars maður leiksins á miðjunni

Yfirburðirnir voru algjörir frá byrjun og eftir 18. mínútna leik var Ísland komið í 2-0 með tveimur mörkum frá Söru Björk, fyrirliða. Íslands skoraði svo 4 mörk í síðari hálfleik en Dagný Brynjarsdóttir gerði tvö á meðan Glódís Perla og Selma Sól gerðu sitthvort markið.

Byrjunarlið:

Sandra Sigurðardóttir markvörður 6

Hafði alveg ofboðslega lítið að gera í markinu í dag. Fékk ekkert skot á markið.

Guðný Árnadóttir, hægri bakvörður 6

Gríðarlega örugg varnarlega og átti fína spretti upp völlinn.

Glódís Perla, miðvörður 7

Glódís gerði allt rétt í dag og bætti hefðbundna frammistöðu með frábæru skallamarki eftir horn.

Ingibjörg Sigurðardóttir, miðvörður 6

Steig ekki feilspor varnarlega auk þess að stýra vel liðinu fyrir framan sig.

Áslaug Munda, vinstri bakvörður 7

Fór líklega langt með það í dag að eigna sér vinstri bakvarðar stöðuna með þessari frammistöðu, sérstaklega sóknarlega. Margar góðar sendingar og dugleg að koma upp í sóknina. Örugg varnarlega.

Sara Björk (F), miðjumaður 9

Frábær þennan klukkutíma sem hún spilaði í dag. Skoraði fyrstu tvö mörkin og lagði svo upp það þriðja á Dagnýju ásamt því að vinna gríðarlega vel fyrir liðið. Fyrirliðinn var mikið gagnrýnd eftir EM í sumar en svaraði því með öflugri frammistöðu í dag.

Dagný Brynjars, miðjumaður 9, Maður leiksins

Frábær leikur hjá Dagnýju. Vann erfiðu vinnuna á miðjunni allan leikinn ásamt því að sýna enn og aftur hversu öflug hún er í að skila sér inn í teig andstæðinganna. Dagný skoraði tvö mörk í dag og jafnaði þar með Hólmfríði Magnúsdóttur í 2. sæti yfir markahæstu landsliðskonur Íslands.

Gunnhildur Yrsa, miðjumaður 7

Frábær í hápressunni allan tímann og hirti upp marga dauða bolta. Gerði aðra leikmenn í kringum sig betri og vann talsvert mikla vinnu inni á vellinum.

Amanda Andradóttir, hægri kantmaður 8

Mjög góður leikur hjá Amöndu sem fór oft illa með varnarmenn Hvít-Rússa. Þrátt fyrir að tekið var af henni fyrsta landsliðsmarkið þá átti hún stóran þátt í tveimur mörkum því hún sótti vítið sem Sara Björk skoraði úr og lagði upp mark Glódísar.

Sveindís Jane, vinstri kantmaður: 8

Gjörsamlega magnaður leikmaður sem bara vex og vex. Leggur upp tvö mörk í dag og þau hefðu hæglega getað orðið fleiri. Varnarmenn Hvíta-Rússlands réðu ekkert við hana.

Berglind Björg, framherji 5

Berglind Björg náði ekki alveg að sýna sitt rétta andlit í dag. Hélt á tíðum boltanum illa og blandaði sér lítið í sóknarleikinn. Aðallega vegna þess að flestar sóknir Íslands fóru upp kantana.

Varamenn:

Selma Sól Magnúsdóttir - 7 Kom inn fyrir Sara Björk Gunnarsdóttir á 63. mínútu

Flott innkoma hjá Selmu sem var fljót að koma sér inn í leikinn. Skoraði sjötta mark Íslands.

Elín Metta Jensen 6 - Kom inn fyrir Berglind Björg Þorvaldsóttir á 63. mínútu

Þokkaleg innkoma. Gott að sjá hana á vellinum. Gerði lítið.

Elísa Viðarsdóttir 6 - Kom inn fyrir Áslaug Munda Gunnlaugsdóttir á 63. mínútu

Lítið að gera varnarlega en fín sóknarlega.

Svava Rós Guðmundsdóttir - Kom inn fyrir Amanda Andradóttir á 77. mínútu

Spilaði of lítið til að fá einkunn.

Alexandra Jóhannsdóttir kom inn á fyrir Gunnhildi Yrsu á 77. mínútu

Lagði upp sjötta markið á Selmu. Spilaði of lítið til að fá einkunn.