Innlent

„Það eru aðrir ráðherrar sem titra hérna í hnjánum“

Tryggvi Páll Tryggvason skrifar
Pallurinn var vígður í dag í blíðskaparverði.
Pallurinn var vígður í dag í blíðskaparverði. Vísir/Gulli

Útsýnispallurinn á Bolafjalli var formlega vígður í morgun. Ríkisstjórnin var viðstödd vígsluna og ljóst er að sumir þeirra eru lofthræddari en aðrir.

Það var Pétur Vigfússon, íbúi á Bolungarvík sem fékk þann heiður að klippa á borðann í mikilli veðurblíðu. Var útsýnispallurinn, sem var byggður utan á Bolafjalli í um sex hundruð metra hæð, því formlega opnaður.

Fjölmiðlamaðurinn Gulli Helgason var staddur á Bolafjalli í morgun. Streymdi hann frá athöfninni í beinni útsendingu í Bítinu á Bylgjunni og Stöð 2 Vísi í morgun.

Ríkisstjórnin á hengiflugi.Vísir/Gulli

Það vildi svo til að ríkisstjórnin er stödd á Vestfjörðum en árlegur sumarfundur hennar verður haldinn á Ísafirði í dag. Ráðherrarnir nýttu því tækifærið og voru viðstaddir opnunina.

Sigurður Ingi fann sér góðan stað en Áslaug Arna finnur ekki fyrir lofthræðslu

Gulli ræddi við flesta ráðherrana og má ljóst telja að þeir séu mislofthræddir. Bjarni Benediktsson fjármálaráðherra og formaður Sjálfstæðisflokksins steig til að mynda varfærnum skrefum inn á pallinn.

Bjarni, þú ert ósmeykur?

„Ja, ég er að fikra mig hérna út á pallinn. Ég er ekki lagstur í jörðina ennþá.

Við Bolafjall í dag.Gulli Helga

Gulli benti þá Bjarna á að hann hefði ekkert kíkt mikið yfir brúnina, og teymdi hann að handriðinu.

„Þetta er náttúrulega stórkostlegt. Pallurinn gefur manni ákveðna öryggiskennd sem að skiptir máli,“ sagði Bjarni sem sagðist einnig vera á pallinum til að kanna hvort að það væri rétt að það væri hægt að sjá til Grænlands af pallinum.

Klippa: Ráðherrarnir mislofthræddir á útsýnispallinum á Bolafjalli

Áslaug Arna Sigurbjörnsdóttir, ráðherra háskóla, iðnaðar og nýsköpunarmála, steig hins vegar óhrædd út á pallinn.

„Þetta er ótrúlega merkilegt og fallegt. Ég er svo heppin að vera ekki lofthrædd þannig að það eru aðrir ráðherrar sem titra hérna í hnjánum,“ sagði Áslaug Arna.

Sigurður Ingi Jóhannson, innviðaráðherra og formaður Framsóknarflokksins, var búinn að finna sér góðan stað á miðjum pallinum þegar Gulli náði tali af honum.

„Þetta er geggjaður staður og geggjað mannvirki,“ sagði Sigurður Ingi sem bætti við að pallurinn væri gott dæmi um óendanleg tækifæri sem hægt væri að nýta til að ýta undir náttúru Íslands.

„Þegar við ýtum undir hana með svona mannvirkjum þá margfaldast hún,“ sagði Sigurður Ingi sem var einnig spurður að því hvort hann væri lofthræddur.

Klippa: Gulli Helga tekur forskot á sæluna á Bolafjalli

„Ekki alvarlega en ég finn alveg fyrir því,“ sagði Sigurður Ingi sem lenti þá í því sama og Bjarni, Gulli einfaldlega teymdi hann að handriðinu til að kíkja yfir.

„Þetta er allt í lagi, það er verra að horfa hérna niður,“ sagði Sigurður Ingi og benti á möskvana í gólfi pallsins.

Við Bolafjall í dag.Vísir/Gulli

Sagði Gulli þá við Sigurð Inga að besta útsýnið væri á enda pallsins.

„Já, ég ætla ekki þangað.“

Sjá má viðtöl Gulla við ráðherrana sem og fleiri sem voru staddir á pallinum í morgun hér að ofan.

Rætt var við Finnboga Bjarnason, verkefnastjóri verksins, ræddi um útsýnispallinn í Bítinu á morgun. 


Tengdar fréttir

Útsýnispallur leiði ferðafólk í kaffi og kleinur í Skálavík

Eigendur eyðijarðar í Skálavík, vestan Bolungarvíkur, sjá fram á að útsýnispallurinn á Bolafjalli komi til með að hafa svo mikið aðdráttarafl að grundvöllur verði til að opna kaffihús. Bóndabær, sem fór í eyði fyrir hartnær sextíu árum, muni þannig lifna við.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.