Innlent

Fagna fimmtán ára afmæli risastórs hornsteins í atvinnulífi Austurlands

Kristján Már Unnarsson skrifar
Einar Þorsteinsson, forstjóri Alcoa Fjarðaáls í Reyðarfirði.
Einar Þorsteinsson, forstjóri Alcoa Fjarðaáls í Reyðarfirði. Sigurjón Ólason

Alcoa Fjarðaál fagnaði fimmtán ára afmæli í dag með opnu húsi og fjölskylduskemmtun í álverinu. Forstjórinn segir fyrirtækið risastóran hornstein í atvinnulífi á Austurlandi.

Í fréttum Stöðvar 2 var fjallað um álverið í Reyðarfirði en það er stærsti vinnustaður Austurlands.

„Það eru um áttahundruð manns sem vinna hjá okkur, dags daglega, beint og óbeint. Og ef við tökum svo önnur afleidd störf þá erum við með umtalsvert meira. Þannig að við erum risastór hornsteinn í atvinnulífinu á Austurlandi,“ segir Einar Þorsteinsson, forstjóri Alcoa Fjarðaáls.

Alcoa Fjarðaál er við Reyðarfjörð.Arnar Halldórsson

Íbúafjöldinn á Reyðarfirði tók kipp með komu þess. Þar var iðnfyrirtækið Launafl sérstaklega stofnað til að þjónusta álverið en hjá því starfa núna um eitthundrað manns. 

„Áður en álverið kom þá var þetta að vera komið niður í um 600 manns sem bjuggu hérna. En núna eru þetta að verða 1.500 manns. Þannig að það hefur orðið gífurleg breyting. Og í rauninni ef álverið hefði ekki komið þá hefðu Austfirðir ekki verið það sem þeir eru í dag,“ segir Reyðfirðingurinn Magnús Helgason, framkvæmdastjóri Launafls.

Magnús Helgason er framkvæmdastjóri Launafls á Reyðarfirði, eins helsta undirverktaka álversins.Sigurjón Ólason

Systurnar Aðalheiður og Harpa Vilbergsdætur starfa báðar hjá Alcoa sem og eiginmenn þeirra.

„Þegar ég var í háskóla sá ég ekki endilega fyrir mér að koma aftur heim,“ segir Harpa.

„Þannig var umræðan hjá okkur. Við vorum fyrir sunnan. Maðurinn minn var að læra. Þá var staðan þannig að við vorum ekkert endilega á leiðinni til baka,“ segir Aðalheiður.

„En síðan kemur undirritunin og hún verður bara til þess að við kaupum hús og drífum okkur austur,“ segir Aðalheiður ennfremur.

Harpa er fræðslustjóri álversins. Aðalheiður er fulltrúi mannauðsmála. Systurnar eru jafnframt drifkraftar í félagslífi Reyðarfjarðar, Harpa formaður kvenfélagsins og Aðalheiður formaður íþróttafélagsins.Sigurjón Ólason

En hafa bændur áhyggjur af sambýli við álverið? Við spurðum þau á Sléttu.

„Nei, ég hef ekki áhyggjur. Ekki af þessu álveri. Það er bara mjög vel hugsað um allar mengunarvarnir og þeir gera allt sem í þeirra valdi stendur,“ segir Þuríður Lillý Sigurðardóttir, sem rekur sauðfjárbú á Sléttu ásamt manni sínum, Guðjóni Má Jónssyni.

Bændurnir á Sléttu í Reyðarfirði, Guðjón Már Jónsson og Þuríður Lillý Sigurðardóttir, ásamt dótturinni Dagbjörtu Ósk.Sigurjón Ólason

Um 350 þúsund tonn af áli fara frá álverinu með skipum út í heim á hverju ári. En í hvað er varan notuð?

Forstjórinn segir um helming fara á almennan markað sem svokallað hráál en hinn helmingurinn sé meira unnin vara og nefnir háspennulínur sem dæmi.

„Vírarnir í byggðalínunni eru úr áli. Og nýjustu línurnar, það má alveg búast við því að í þeim sé ál frá Fjarðaáli, bara sem dæmi.

Felgurnar á bílnum sem við komum á, þær eru nokkuð örugglega steyptar úr áli. Og við erum að framleiða þannig virðisaukandi vöru líka,“ segir Einar Þorsteinsson, forstjóri Alcoa Fjarðaáls.

Hér má sjá frétt Stöðvar 2:


Tengdar fréttir

Gáfu tuttugu milljónir til náttúruverndar

Samfélagssjóður Alcoa í Bandaríkjunum hefur veitt Fjarðabyggð 130 þúsunda dala styrk til náttúruverndar og minjavörslu á Gerpissvæðinu og Hólmanesi. Styrkurinn var formlega veittur í Viðfirði á föstudaginn en var greiddur til Fjarðabyggðar í fyrra og var þá um tuttugu milljónir króna.

Heimsmarkaðsverð á áli orðið ævintýralega hátt

Heimsmarkaðsverð á áli fór í gær í 3.850 dollara tonnið. Þetta er langhæsta álverð sögunnar. Álmarkaðir hafa heldur róast framan af degi og verðið sigið niður, fór niður í 3.740 dollara í morgun og var komið niður undir 3.500 dollara um hádegisbil.

Ósýnilega fyrirtækið með 350 manns í vinnu

Það er kallað stærsta ósýnilega fyrirtæki landsins og er með yfir þrjú hundruð manns í vinnu, - byggðist upp á þjónustu við íslensk álver og smíðar nú sérhæfðan vélbúnað fyrir álver víða um heim.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.