Viðskipti innlent

Kortavelta erlendra ferðamanna aldrei meiri

Samúel Karl Ólason skrifar
Farþegar á Keflavíkurflugvelli.
Farþegar á Keflavíkurflugvelli. Vísir/Vilhelm

Kortavelta erlendra ferðamanna hér á landi var 28,3 milljarðar króna í júní. Það er aukning um 27,4 prósent á milli ára og hefur veltan aldrei mælst hærri í júnímánuði frá því mælingar hófust árið 2012.

Kortavelta Íslendinga í útlendum hefur sömuleiðis aldrei verið hærri.

Þetta kemur fram á vef Rannsóknaseturs verslunarinnar en þar segir að fyrir hafi veltan verið mest í júní árið 2018, þá rúmir 25,5 milljarðar króna. Hlutfall erlendrar kortaveltu af heildarkortaveltu á Íslandi var 24,3 prósent í júní síðastliðnum.

Kortavelta Íslendinga var tæpir 88,4 milljarðar króna í júní og samsvarar það aukningu upp á 6,45 prósent frá júní í fyrra.

Þar af var innlend kortavelta í verslun tæpir 47 milljarðar og er það aukning um 0,96 prósent. Innlend kortavelta í verslun á netinu var rúmir 3,2 milljarðar króna í júní og jókst hún um 11,4 prósent á milli ára.

Sömuleiðis var mikil aukning í innlendri kortaveltu í þjónustu á milli ára. Hún var 41,4 milljarður og jókst um rúm þrettán prósent á milli ára. Allt er miðað við breytilegt verðlag.

Heildarvelta innlendra greiðslukorta í verslunum og þjónustu erlendis hefur sömuleiðis aldrei mælst hærri frá upphafi mælinga, árið 1997. Hún var rúmir 22,9 milljarðar króna, sem er aukning um rúma 11,9 milljarða.

Ferðamennska á Íslandi Greiðslumiðlun


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið