Segir Eggert einn fárra sem hafi hlustað á hana

Frá þessu greinir Vítalía á Twitter en hún segir þar að hún eigi Eggerti mikið að þakka. 

„Einn af þeim fáu mönnum sem talaði við mig án þess að þekkja mig, hlustaði og gaf mér tækifærið á að segja mína hlið þegar ÞMJ var búinn að leggja allt aðra sögu á borðið hjá stjórninni,“ skrifar Vítalía í tísti og vísar þar til Þórðs Más Jóhannessonar, fyrrverandi stjórnarformanns Festar, sem er einn þeirra manna sem hún hefur sakað um að hafa beitt sig ofbeldi. 

Eggert sagði í vikunni starfi sínu hjá Festi lausu en hann mun láta af störfum 1. ágúst næstkomandi. Fram kom í tilkynningu frá Eggerti að hann hafi verið lánsamur að vinna með „frábæru samstarfsfólki á þessum árum sem hafa gert Festi og dótturfélög að því sem þau eru í dag.“

Vítalía ýjar að því í tísti sínu að eitthvað meira hafi verið að baki vistaskiptunum hjá Eggerti en hún skrifar að „þetta [sé] spilling og ekkert annað.“

Hún bætir við í svari við tístinu að það hafi verið henni erfitt að lesa frétt sem Mannlíf birti um málið í vikunni, og hún hengir við upphaflega tístið.

„Ég veit hvernig þessir menn spila og hvert þeir stefna. Þeir halda að þeir séu ósnertanlegir. ÞMJ og HJ eru menn sem munu alltaf bakka hvorn annan upp enda leyndarmálin þeirra ansi mörg. Þetta er ekki búið.“

Mál Vítaíu komst fyrst í kastljósið í janúar eftir að viðtal Eddu Falak við hana í hlaðvarpinu Eigin konur birtist. Þar lýsti Vítalía því að hafa orðið fyrir ofbeldi af hendi þriggja eldri karlmanna í sumarbústaðarferð, sem hún hafði mætt í til að hitta þáverandi ástmann sinn, sem samkvæmt heimildum fréttastofu er einkaþjálfarinn Arnar Grant. 

Í kjölfarið var greint frá því að Ari Edwald, þáverandi framkvæmdastjóri Ísey útflutnings, hefði stigið til hliðar úr stjórn fyrirtækisins. Strax sama dag steig Hreggviður Jónsson, þá stjórnarformaður og aðaleigandi Veritas Capital, úr stjórn þess og stjórnum tengdra fyrirtækja. Hreggviður sagði í yfirlýsingu sem hann sendi út að hann harmaði að hafa ekki stigið úr aðstæðunum sem Vítalía lýsti og honum þætti þungbært að heyra um hennar reynslu. Hann teldi sig þó ekki hafa gerst brotlegan við lög. 

Þórður Már sagði sig samdægurs úr stjórn Festar vegna ásakananna og Arnar Grant hætti tímabundið störfum hjá World Class, þar sem hann starfaði sem einkaþjálfari í verktakavinnu.  

Þá lýsti Vítalía því yfir í mars að hún hyggðist kæra Þórð Má, Ara og Hreggvið til lögreglu fyrir kynferðisbrot. Hún hafði  þá bókað tíma hjá kærumóttöku kynferðisbrota hjá lögreglu en fréttastofa hefur ekki vitneskju um hvort hún sé búin að leggja fram kæru á hendur þeim.