Lífið

„Fólk þarf stundum að láta sannfæra sig um að prófa“

Elísabet Hanna skrifar
Snæfríður og fjölskyldan hennar hefur ferðast út um allan heim.
Snæfríður og fjölskyldan hennar hefur ferðast út um allan heim. Skjáskot

Fjölmiðlakonan Snæfríður Ingadóttir og fjölskyldan hennar hafa ferðast um allan heim án þess að borga fyrir húsnæði. Það var einn snjóþungan vetur sem hún fékk nóg af því að allir væru alltaf blautir í fæturna og ákvað að leita lausna.

Yfir hundrað skipti

Snæfríður fór að kynna sér leiðir til þess að ferðast á ódýrari máta í sól og hlýju. Lausnin sem hún fann var íbúðaskipti þar sem ekkert er borgað fyrir húsnæði erlendis og hefur sú lausn orðið hluti að hennar lífsstíl. Vala Matt fékk að heyra allt um það í Ísland í dag og innslagið má sjá í heild sinni hér að neðan. 

„Við erum búin að fara út um allan heim,“

segir hún en fjölskyldan er búin að nýta sér þennan ferðamáta í meira en hundrað skipti á þessum níu árum síðan þau fóru fyrst og segist Snæfríður vera löngu hætt að telja skiptin. 

Ferðalögin urðu stór partur af lífi hennar en í dag hefur hún gefið út fjölda bóka um ferðalög, flutninga erlendis og íbúðaskipti. Þar að auki heldur hún úti heimasíðu og heldur fyrirlestra. „Þú ert náttúrulega að lána heimilið þitt, aleiguna, þannig að fólk þarf stundum að láta sannfæra sig um að prófa.“

Njóta á meðan heilsan er til staðar

Snæfríður segir að þau hjónin vilji ekki bíða eftir ellilífeyrisárunum til þess að láta ferðadraumana rætast heldur njóta á meðan þau eru enn ung og hraust og eru dugleg að ferðast með dætur sínar þrjár. „Þegar þau eru komin þá er kannski heilsan ekki til staðar til þess að gera þessa hluti sem fólki er búið að dreyma alltaf um eða eitthvað annað komið upp á,“ segir hún og bætir glettin við:

„Ef að ég væri pólitíkus þá myndi ég bara dreifa þessum lífeyrisárum yfir lífið hreinlega og fólk gæti bara leyst þau út jafnt og þétt.“

Samkomulag

Hún segir íbúðaskiptin hafa gert það að verkum að þau hafi getað ferðast svona mikið því með því að skipta sleppur þú við stóran hluta af útgjöldum sem fylgja ferðalögum. Hún segir það einnig opna möguleikann á það að vera lengur úti í senn og nýta peningana í eitthvað skemmtilegt.

„Þetta er bara samkomulag á milli tveggja aðila, að lána hús hvors annars, annaðhvort á sama tíma eða ekki á sama tíma.“

Hún segir það einnig vera möguleika að lána húsnæðið sitt þegar það er tómt, eins og t.d. þegar þau eru að ferðast innanlands, án þess að vera sjálf á leiðinni út í skipti. Þannig er hægt að fá punkta til þess að nýta upp í gistingu seinna þegar þau fara sjálf út. 

„Það eru margar leiðir til þess að gera svona íbúðaskipti.“

Samkvæmt henni fer þetta allt fram á netinu og segir hún fjöldann allan af síðum vera í boði. Þar er hægt að gerast meðlimur og er greitt árgjald og mega meðlimir gera skipta eins oft á árinu og óskað er eftir.

Fluttu út í ár

Fjölskyldan hefur verið að nýta sér þetta kerfi í að meðaltali fjórar til sex vikur á ári. Eftir að hafa farið í gegnum íbúðaskipti nokkrum sinnum til Spánar féllu þau svo sannarlega fyrir svæðinu og tóku ákvörðun um að flytja til Tenerife í ár sem þau sjá ekki eftir að hafa gert. 

Þegar þau fluttu út fengu þau aðstoð frá vinum sem þau höfðu eignast í gegnum íbúðaskipti en Snæfríður segir íbúðaskipti vera svo miklu meira en bara frítt húsnæði.

„Stundum myndast einstakt samband. Þú eignast hreinlega vini, þetta verður bara vinátta fyrir lífstíð“

Líka hægt að skipta innanlands

Það er einnig möguleiki á því að gera íbúðaskipti innanlands og nálgast þannig sumarbústaði eða húsnæði annars staðar á landinu. Hún segir það áhugavert að fletta í gegnum síðurnar og sjá hvað sé í boði og þar leynist allskonar fólk:

„Það eru alveg læknar, lögfræðingar og jafnvel alþingismenn sem eru skráðir á þessar síður.“

Hér að neðan má sjá nokkrar myndir af ferðalögunum:


Tengdar fréttir

„Lifði hamingjusöm til æviloka“

Nanna Lovísa Zophoníasdóttir gerði sér lítið fyrir og tók ákvörðun sem breytti öllu hennar lífið. Hún seldi yfirskuldsett húsið sitt í Hafnarfirði og flutti á Vatnsleysuströnd þar sem hún er að gera upp gamlan bóndabæ alveg niður við sjóinn.

„Svo setti ég bara hnefann í borðið og það hlýddu mér allir“

Hanna Rún Ragnarsdóttir byrjaði að stunda rally af miklum móð til þess að komast yfir bílhræðslu sem hún byrjaði að upplifa eftir slæmt bílslys fyrir nokkrum árum. Hún segir konur hræddar við akstursíþróttir því þær séu þekktar sem karlasport og vill hún breyta því.






Fleiri fréttir

Sjá meira


×