Innlent

Afturhvarf til bílisma í Reykjavík yrðu hryllileg tíðindi

Kjartan Kjartansson skrifar
Logi Einarsson, formaður Samfylkingarinnar, lagði áherslu á mikilvægi þess að halda áfram stefnu fráfarandi borgarstjórnarmeirihluta í samgöngu-, skipulags- og umhverfismálum í þættinum Sprengisandi þar sem úrslit borgarstjórnarkosninganna voru gerð upp í morgun.
Logi Einarsson, formaður Samfylkingarinnar, lagði áherslu á mikilvægi þess að halda áfram stefnu fráfarandi borgarstjórnarmeirihluta í samgöngu-, skipulags- og umhverfismálum í þættinum Sprengisandi þar sem úrslit borgarstjórnarkosninganna voru gerð upp í morgun. Vísir/Vilhelm

Hik í uppbyggingu í samgöngumálum og afturhvarf til bílisma í Reykjavík yrðu hryllileg tíðindi fyrir metnað Íslendinga í loftslagsmálum, að sögn Loga Einarssonar, formanns Samfylkingarinnar. Ráðherra Sjálfstæðisflokks segir úrslitin í Reykjavík kröfu um breytingar.

Meirihluti Samfylkingar, Pírata, Vinstri grænna og Viðreisnar í Reykjavík féll í borgarstjórnarkosningunum í gær. Saman fengu flokkarnir tíu borgarfulltrúa. Samfylkingin tapaði tveimur fulltrúum og Viðreisn einum. Tólf fulltrúa þarf til að mynda meirihluta.

Á sama tíma vann Framsóknarflokkurinn verulega á og líklegt er að fjórir borgarfulltrúar hans verði nauðsynlegir til að mynda meirihluta í borginni. Flokkurinn hafði engan borgarfulltrúa fyrir. Sjálfstæðisflokkurinn tapaði tveimur fulltrúum eins og Samfylkingin en er engu að síður stærsti flokkurinn í borgarstjórn með sex fulltrúa.

Logi var gestur í umræðuþættinum Sprengisandi á Bylgjunni í morgun ásamt Katrínu Jakobsdóttur, forsætisráðherra og formanni Vinstri grænna, og Áslaugu Örnu Sigurbjörnsdóttur, háskóla,- iðnaðar -og nýsköpunarráðherra úr Sjálfstæðisflokknum.

Áslaug Arna sagði þar að sú staðreynd að meirihluti undir stjórn Samfylkingarinnar væri nú fallinn öðru sinni. Það væru mjög skýr skilaboð um breytingar í borginni. Logi og Dagur B. Eggertsson borgarstjóri virtust engu að síður ætla að reyna að finna enn einn flokkinn til að reisa meirihlutann við.

Þetta gaf Logi lítið fyrir og benti á að Sjálfstæðisflokkurinn þekkti það einnig vel að hrökklast úr meirihluta en finna svo nýja „meðspilara“. Út á það gengi leikurinn.

Viss um að nýr meirihluti haldi í núverandi stefnu í skipulags- og samgöngumálum

Logi sagði niðurstöðuna í Reykjavík þó liggja þyngst á samfylkingarfólki eftir sveitarstjórnarkosningar sem hafi verið eins og Mackintosh-konfektkassi fyrir flokkinn með góðum og slæmum bitum.

Taldi Logi að Dagur borgarstjóri gæti verið upplitsdjarfur í dag. Hann eigi enn möguleika á að mynda meirihluta. Niðurstaðan sýni að fólk vilji enn feta þá leið sem meirihlutinn hafi farið undanfarin tólf ár um þéttingu byggðar og bættar almenningssamgöngur sem hafi að mati Loga breytt Reykjavík úr þorpi í evrópska stórborg.

Nýtt meirihlutasamstarfi kunni að þurfa að vera með öðrum formerkjum en áður en hann teldi að úrslitin séu ekki ákall borgarbúar um breytingar frá þessari stefnu. Benti hann á að flokkar sem hafi lagst gegn þéttingu byggðar hafi ekki riðið feitum hesti frá kosningunum, Miðflokkurinn og Sjálfstæðisflokkurinn.

Ef Íslendingar ætluðu sér að ná árangri í loftslagsmálum þyrfti fyrst að huga að þeim málum á höfuðborgarsvæðinu þar sem 80% landsmanna búi. Því skipti borgarlína og þétting byggðar svo miklu máli.

„Allt hik í uppbyggingu í samgöngumálum í Reykjavík og afturhvarf til bílismans væru svakalega vond tíðindi fyrir höfuðborgarbúa en líka hryllileg tíðindi fyrir Íslendinga sem ætla að vera metnarðafullir í loftslagsmálum,“ sagði Logi fullviss um að nýr meirihluti yrði til sem héldi núverandi stefnu í skipulags- og samgöngumálum.

Tengir úrslitin ekki við ríkisstjórnarsamstarfið

Katrín sagði erfitt að draga gríðarlegar ályktanir af úrslitum kosninganna á landsvísu þar sem aðstæður á hverjum stað væru svo ólíkar. Hennar flokkur hefði styrkt sig eða haldið sínu þar sem vel gekk síðast. Sveitarstjórnarfulltrúum flokksins fjölgi frá síðustu kosningum en með þeim fyrirvara að þeir hafi ekki verið margir fyrir.

Í borginni náði VG aðeins inn einum manni en var aðeins hálfdrættingur á við Sósíalistaflokkinn með rétt um fjögur prósent atkvæða. Katrín vildi ekki tengja það við að kjósendur vildu refsa flokknum fyrir ríkisstjórnarsamstarf við Sjálfstæðis- og Framsóknarflokk. Benti hún á að niðurstaðan nú væri svipuð og í síðustu sveitarstjórnarkosningum.

„Auðvitað hefði ég viljað uppskera meira á höfuðborgarsvæðinu. Það er ekki hægt að segja annað en það,“ sagði Katrín.

Hennar túlkun á úrslitunum væri sú að Vinstri grænum hafi mistekist að byggja upp öflugt sveitarstjórnarstarf í Reykjavík sem flokknum hafi tekist að gera annars staðar á landinu.

„Það er augljóslega eitthvað sem þarf að skoða,“ sagði Katrín sem benti á að árangur Framsóknarflokksins nú sýndi að hlutirnir gætu breyst hratt á milli kosninga.

Leiti sér að nýrri hækju undir meirihlutann

Áslaug Arna benti ítrekað á að meirihlutasamstarf Dags borgarstjóra og Samfylkingarinnar við aðra flokka hefði nú fallið í tvígang í kosningum á undanförnum árum. Sagði hún flokkinn nú leita að „hækju“ og biðla til Framsóknarflokksins um að ganga undir fallinn meirihluta líkt og Viðreisn gerði eftir síðustu kosningar.

Hafnaði Logi því að einhver flokkur í meirihlutanum hefði verið hækja fyrir Samfylkinguna á kjörtímabilinu. Þeir hafi allir verið fullir þátttakendur og samstarfið gefist vel. Hvað Framsókn varðaði væri ráðherra hans aðili að samgöngusáttmála fyrir Reykjavík. Þannig gætu margir komið að nauðsynlegum aðgerðum í borginni.

„Það væri ótrúlega vont ef við færum í gamaldags asnalegri flokkapólitík að fórna þeim frábæra árangri sem hér hefur náðst á síðustu tólf árum,“ sagði hann. 


Tengdar fréttir

Stór­sigur Fram­sóknar setur Einar í bíl­stjóra­sætið

Borgarstjórnarmeirihlutinn er fallinn og Framsóknarflokkurinn er í lykilstöðu fyrir myndun nýs meirihluta. Flokkurinn náði fjórum fulltrúum inn í borgarstjórn en Samfylkingin og Sjálfstæðisflokkurinn töpuðu tveimur fulltrúum hvor.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×