Ræðu Pútín á „sigurdeginum“ beðið með eftirvæntingu

Hólmfríður Gísladóttir skrifar 9. maí 2022 06:29

Sigurdagurinn er Rússum afar mikilvægur og einna víst að yfirlýsinga er að vænta í ræðu Pútín, hvers efnis sem þær kunna að verða. AP/Sputnik/Mikhail Metzel

Heimsbyggðin bíður þess nú með eftirvæntingu að Vladimir Pútín Rússlandsforseti ávarpi rússnesku þjóðina í dag, þegar Rússar fagna sigri sínum yfir nasistum í seinni heimstyrjöldinni.

Efnt verður til hátíðarhalda víða um Rússland en aðalviðburðurinn verður gríðarmikil skrúðganga og hergagnasýning á Rauða torginu í Moskvu.

Menn segja nokkra möguleika í stöðunni; meðal annars að Pútín magni spennuna með því að lýsa formlega yfir stríði við Úkraínu, eða dragi úr henni með því að lýsa yfir sigri í hinni „sérstöku hernaðaraðger“.

Þá er mögulegt að hann muni fara millileið og lýsa yfir einhvers konar áfangasigri en um leið undirbúa rússnesku þjóðina fyrir langa og stranga baráttu.

Stjórnmálaspekingar og embættismenn á Vesturlöndum hafa lengi rætt um það að stjórnvöld í Moskvu hafi löngum stefnt að því að geta lýst yfir sigri í Úkraínu á „sigurdeginum“ 9. maí.

Það er hins vegar erfitt að sjá hvernig Pútín myndi rökstyðja slíka yfirlýsingu, þar sem rússneski herinn er langt frá því að hafa náð settum markmiðum; að „afhervæða og afnasistavæða“ Úkraínu.

Þá hafa þeir hvorki „frelsað“ Donbas, eins og til stóð, né náð yfirráðum meðfram allri strandlengju landsins, frá Transnistríu til Donbas.

Innrás Rússa í Úkraínu Úkraína Rússland Hernaður Vladimír Pútín

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.