Chrishell Stause fann ástina á ný

Í nýjustu þáttaröðinni fylgdust áhorfendur með Stause og Jason Oppenheim, eiganda fasteignasölunnar, opinbera ástarsambandið þeirra sem þau höfðu haldið leyndu um nokkurt skeið. Fréttirnar komu samstarfsfólki þeirra í opna skjöldu en parið virtist yfir sig ástfangið. Það var því sorglegt þegar leiðir skildu undir lok þáttaraðarinnar því Stause þráir heitt að eignast barn en Oppenheim fannst hann ekki tilbúinn.

Fasteignasalar stjarnanna komu síðan saman aftur til að fara yfir síðustu þáttaröðina en það var þá sem Stause sagðist vera byrjuð að hitta G Flip, sem heitir fullu nafni Georgia Claire Flipo. Hán er frá Ástralíu og starfar við tónlist og er afar fjölhæft. Hán syngur, semur lögin, trommar og er allt í öllu í framleiðsluferlinu.

Í lokaþætti Selling Sunset útskýrði Stause að G Flip sé kynsegin og þess vegna beri að nota persónufornafnið hán.

Það er þónokkur aldursmunur á parinu en Stause er fertug og G Flip 27 ára.