Tókust á um lóðarúthlutun á landi innan flugvallargirðingar

Kristján Már Unnarsson skrifar 5. maí 2022 23:39

Landið telst enn flugvallarsvæði og óviðkomandi er bannaður aðgangur. Sigurjón Ólason

Átök urðu á fundi borgarráðs Reykjavíkur í dag um þá tillögu borgarstjóra að úthluta fimm þúsund fermetra lóð og byggingarrétti fyrir allt að 140 íbúðir við Einarsnes 130. Lóðin er núna innan flugvallargirðingar í svokölluðum Nýja Skerjafirði á svæði sem Sigurður Ingi Jóhannsson innviðaráðherra lýsti yfir í gær að borgin fengi ekki afhent meðan ekki væri kominn betri flugvallarkostur í stað Reykjavíkurflugvallar.

Tillagan var samþykkt með fjórum atkvæðum meirihlutans, fulltrúa Samfylkingarinnar, Viðreisnar, Pírata og Vinstri grænna, gegn þremur atkvæðum minnihlutans, fulltrúa Sjálfstæðisflokksins. Áheyrnarfulltrúar Sósíalistaflokksins og Miðflokksins lýstu einnig andstöðu í bókun en málið fer núna til endanlegrar afgreiðslu borgarstjórnar.

„Rétt er að benda á að uppbygging í „Nýja Skerjafirði“ er í algeru uppnámi. ISAVIA og innviðaráðherra telja að nýtt íbúðahverfi í Skerjafirði skerði rekstraröryggi flugvallarins. Það er því fráleitt að hægt sé að úthluta byggingarlóðum einmitt á því svæði sem deilt er um,“ segir í bókun borgarráðsfulltrúa Sjálfstæðisflokksins.

„Hér er um stórt mál að ræða bæði hvað varðar rekstur flugvallarins og fyrirhugaða íbúðabyggð. Það er með öllu ótækt að úthluta þessu svæði á síðasta fundi borgarráðs fyrir borgarstjórnarkosningar,“ segja sjálfstæðismenn ennfremur í bókun sinni.

Borgarstjórnarmeirihlutinn er í óða önn að úthluta lóðum og byggingarrétti í Nýja Skerjafirði.Reykjavíkurborg

„Áheyrnarfulltrúi Sósíalistaflokks Íslands telur ekki tímabært að selja byggingarrétt á landi sem liggur að Reykjavíkurflugvelli eða undir Reykjavíkurflugvelli á meðan hann er í fullri notkun og jafn stór hluti af neyðarúrræði landsbyggðarinnar og nú er. Þegar um alvarleg slys er að ræða skipta mínútur sköpum.

Ennfremur teljum við mikilvægt að styðja við landsbyggðina og standa undir nafni sem höfuðborg landsins og grafa ekki undan flugvellinum og núverandi notkun hans á meðan aðrar lausnir eru ekki í augsýn,“ segir í bókun fulltrúa Sósíalistaflokksins.

Áheyrnarfulltrúi Miðflokksins segir í sinni bókun að hér sé um að ræða svæði fyrir innan flugvallargirðinguna.

„Vitnað er í orð ráðherra samgöngumála sem segir að ekkert sé verið að fara að byggja í Skerjafirði þar sem flugvöllurinn er ekki á leiðinni þaðan. Enginn annar sambærilegur eða betri staður hefur fundist fyrir flugvöllinn. Er hér einhver misskilningur í gangi? Orð ráðherra og orð borgarstjóra fara ekki saman. Er verið að fara að byggja í Skerjafirði eða ekki?“ segir í bókun fulltrúa Miðflokksins.

Fulltrúar flokkanna sem mynda borgarstjórnarmeirihlutann bókuðu ekkert um málið.

Skylmingar ráðherra og borgarstjóra um Skerjafjörð mátti sjá í frétt Stöðvar 2 í gær:

Borgarstjórn Reykjavíkurflugvöllur Skipulag Reykjavík

Tengdar fréttir

Segist taka undir áhyggjur ráðherra og Isavia um að ný byggð ógni flugöryggi

Leiðtogi sjálfstæðismanna í borgarstjórnarkosningunum, Hildur Björnsdóttir, segist styðja flugvöll í Vatnsmýri meðan ekki finnst annar jafngóður kostur. Oddviti Miðflokksins, Ómar Már Jónsson, segir sinn flokk þann eina sem ætli sér að standa vörð um flugvöllinn.

5. maí 2022 21:31

Ráðherra neitar að afhenda landið en borgarstjóri segist hafa afsalið

Innviðaráðherra neitar borginni um að byggja í Skerjafirði og segir að hún fái ekki meira af landi Reykjavíkurflugvallar fyrr en nýr flugvallarkostur sé fundinn og uppbyggður. Borgarstjóri hafnar því að flugöryggi verði raskað og minnir á að borgin eigi landið.

4. maí 2022 22:22

Segir það verstu niðurstöðuna að kremja lífið úr flugvellinum

Isavia telur sér ekki fært að verða við beiðni Reykjavíkurborgar um að afhenda flugvallarland í Skerjafirði til íbúðabygginga og varpar ábyrgðinni á Sigurð Inga Jóhannsson innviðaráðherra.

3. maí 2022 21:41

Borgin telur Nýja Skerjafjörð ekki trufla rekstur flugvallar

Talsmenn borgarstjórnarmeirihlutans vilja hefja uppbyggingu Nýja Skerjafjarðar sem allra fyrst og hafna því að byggingar þar skerði rekstraröryggi Reykjavíkurflugvallar.

19. apríl 2022 22:55

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir