„Kollurinn minn er fullur af verkefnum sem eiga eftir að líta dagsins ljós“

Blaðamaður heyrði í Margréti og fékk að forvitnast um upphaf Hugmyndabankans og hvernig hann hefur þróast yfir í það gleðitól sem hann er og hvernig hann nýtist foreldrum og kennurum.

Hvernig kviknaði hugmyndin?

Ætli hún hafi ekki alltaf blundað í mér. Ég er stútfull af hugmyndum og hef frá unga aldri átt ótrúlega auðvelt með að koma með hugmyndir og framkvæma þær. Þá sérstaklega tengt föndri, leikjum, samveru og kennslu. 

„Ég hef oft hugsað hvað væri gott að hafa öll þau verkefni, leiki eða annað sem ég hef verið að gera á einum stað.“

Í gegnum tíðina hef ég líka fengið spurningar hvernig ég hafi gert hitt eða þetta og þá hef ég oft hugsað hvað það væri nú gott að geta gengið að hugmyndunum sem ég hef verið að framkvæma.

Hvernig voru fyrstu skrefin?

Ég var byrjuð að geyma hugmyndir fyrir sjálfa mig inn á lokuðum reikningi á Instagram. Þegar vinkonur mínar fengu veður af því þá var ég hreinlega tekin á beinið. Þær vildu meina að ég ætti að leyfa öðrum að njóta þessa hafsjós af hugmyndum sem ég hafði verið að geyma. 

Þær létu mig ekki í friði fyrr en ég gafst upp og lét verða af Hugmyndabankanum. 

„Ég er þakklát að eiga vinkonur sem ýta manni áfram í lífinu.“

Síðan þá hef ég verið að setja tvær til þrjár hugmyndir inn á viku og reyni að hafa verkefnin fjölbreytt, skemmtileg og ekki of flókin.

Hefur þú alltaf verið mikill föndrari?

Já, frá blautu barnsbeini. Ég ólst upp í föndri má segja, en móðir mín var dugleg að föndra með okkur systkinunum. 

„Og pabbi tók alltaf virkan þátt þrátt fyrir að vera með tíu þumalputta.“

Föndrið hefur því alltaf loðað við mig og mun sjálfsagt alltaf gera það, þar sem ég veit fátt skemmtilegra en að gleyma mér í einhverju föndri með stelpunum mínum. Föndur býður líka upp á svo marga möguleika og allir ættu að geta fundið eitthvað við sitt hæfi.

Hvernig viðbrögð hefur miðillinn verið að fá?

Ég hef fengið mjög jákvæð viðbrögð við Hugmyndabankanum og það er yndislegt hvað fólk úr ýmsum áttum er þakklátt fyrir verkefnin sem ég set inn. Það gleður mig óendanlega mikið og ég veit fátt skemmtilegra en að sjá verkefnin mín lifna við inni á heimilum fólks, í skólastofum, leikskólum eða frístundaheimilum. 

„Það er svo gaman að geta glatt.“

Er eitthvað skemmtilegt á döfinni?

Framundan er að sjálfsögðu meira föndur og enn meiri gleði. Ég ætla að halda áfram að setja inn skemmtileg verkefni fyrir allan aldur. 

„Kollurinn minn er fullur af verkefnum sem eiga eftir að líta dagsins ljós svo það sem er komið nú þegar inn er bara toppurinn á ísjakanum.“