Innlent

Tímasetning heræfingar á Íslandi ekki sögð tengjast Úkraínustríði

Kristján Már Unnarsson skrifar
Frá heræfingu á Keflavíkurflugvelli í október 2018.
Frá heræfingu á Keflavíkurflugvelli í október 2018. Skjáskot/Stöð 2

Herskip frá fimm NATO-ríkjum taka þátt í heræfingunni Norður-Víkingi sem fram fer á Íslandi og í hafinu við landið í fyrri hluta næsta mánaðar. Sérfræðingur um varnarmál telur engar líkur á að æfingin tengist spennu vegna Úkraínustríðsins.

Í fréttum Stöðvar 2 var fjallað um varnaræfinguna Norður-Víking, sem fram fer dagana 2. til 14. apríl næstkomandi. Í fréttatilkynningu utanríkisráðuneytis segir að megintilgangurinn sé að æfa varnir sjóleiða umhverfis Ísland sem og mikilvægra innviða, eins og fjarskiptakapla. Til hafi staðið að halda æfinguna vorið 2020 en vegna heimsfaraldursins hafi þeim áformum verið slegið á frest.

Um sé að ræða reglubundna tvíhliða varnaræfingu Íslands og Bandaríkjanna með þátttöku fleiri vina- og bandalagsríkja en einnig taki þátt í henni sjóherir Bretlands, Frakklands, Þýskalands og Noregs. Liður í Norður-Víkingi sé svo lending bandarískra landgönguliða við Miðsand í Hvalfirði.

Albert Jónsson, fyrrverandi sendiherra, er sérfræðingur í utanríkis- og varnarmálum.Egill Aðalsteinsson

Í ljósi tímasetningarinnar spyrja eflaust margir hvort þessi æfing núna tengist spennu NATO-ríkja og Rússlands vegna Úkraínu. Albert Jónsson, fyrrverandi sendiherra, fullyrðir að svo sé ekki og bendir á að æfingunni hafi áður verið frestað vegna covid og að slíkar heræfingar séu undirbúnar með löngum fyrirvara.

Þá sé í samkomulagi Íslands og Bandaríkjanna frá árinu 2006 gert ráð fyrir slíkum æfingum reglulega. Þetta sé hluti af því.

„Þessi tiltekna æfing, Norður-Víkingur, var fyrst 1982 þannig að það eru engar líkur á því að þetta tengist Úkraínumálinu,“ segir Albert, sem er sérfræðingur í utanríkis- og varnarmálum.

-Þannig að það er ekki verið að senda Rússum nein sérstök skilaboð með því að hafa æfingar hér?

„Það tel ég alveg útilokað og ekkert sem bendir til þess,“ svarar Albert.

Herskipafloti í Sundahöfn í Reykjavík haustið 2018.Skjáskot/Stöð 2

Af Íslands hálfu taka Landhelgisgæslan og lögreglan þátt í þeim hluta æfingarinnar sem snýr að leit og björgun almennra borgara. Alls er reiknað með að heildarfjöldi þátttakenda í æfingunni á Íslandi verði rúmlega 700 manns, um helmingur þeirra verður á öryggissvæðinu á Keflavíkurflugvelli.

Þar sem heræfingarnar fara að miklu leyti fram á hafinu í kringum landið verður almenningur lítið var við þær. Það væri helst að menn gætu séð hertól þegar æfingunum lýkur um páskana en þá er von á allt að fjórum herskipum í heimsókn til Reykjavíkur.

Hér má sjá frétt Stöðvar 2:


Tengdar fréttir

Um­fangs­mikil varnar­æfing við Ís­lands­strendur í byrjun apríl

Dagana 2. til 14. apríl næstkomandi fer varnaræfingin Norður-Víkingur 2022 fram á Íslandi og á hafinu í kringum landið. Megintilgangur æfingarinnar er að æfa varnir sjóleiða umhverfis Ísland og mikilvægra öryggisinnviða en einnig leit og björgun á sjó og landi.

Mótmælir harðlega heræfingum í Þjórsárdal

Anna María Flygenring. bóndi í Hlíð og íbúi í Skeiða og Gnúpverjahreppi, mótmælir harðlega heræfingum í Þjórsárdal og talar um tindátaleik í því sambandi. Hópur hermanna tók þátt í vetraræfingu í dalnum í dag og mun mæta aftur þangað á morgun.

Kafbátur NATO í Reykjavíkurhöfn

Kafbátaeftirlitsæfing Atlantshafsbandalagsins (NATO) hefst í dag og stendur til 6. júlí næstkomandi. Hún fer fram við Íslandsstrendur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×