Sport

Sato ætlar að klára Gunnar

Atli Arason skrifar
Gunnar Nelson í hringnum með Santiago Ponzinibbio.
Gunnar Nelson í hringnum með Santiago Ponzinibbio. Myhnd/mjolnir.is/Sóllilja Baltasarsdóttir

Gunnar Nelson mun mæta hinum japanska Takashi Sato á UFC-bardagakvöldinu í London næsta laugardagskvöld.

Sato fékk stuttan fyrirvara fyrir bardagann en hann stekkur inn fyrir Claudio Silva sem varð að draga sig úr leik vegna meiðsla. Stuttur fyrirvari fyrir bardagann er alls ekki að trufla Sato sem er búinn að bíða lengi eftir að komast aftur í búrið. Sato hefur ekki barist síðan í nóvember 2020.

„Ég er búinn að vera að bíða lengi eftir því að fá bardaga en þess vegna er það alls ekkert vandamál fyrir mig að mæta til leiks með stuttum fyrirvara. Ég er búinn að vera að halda þyngd og æfa vel allan tíman frá síðasta slag,“ sagði Takashi Sato í viðtali við Pétur Marinó hjá MMAfréttir.is

„Mér finnst ég verða betri og betri með hverjum degi þannig ég þarf bara að mæta tilbúinn í bardagann.“

Sato segist vita upp á hár hvernig eigi að sigra Gunnar. Sato hefur meðal annars fengið góð ráð frá æfingafélögum sínum í Sanford MMA þar sem hann æfir með Gilbert Burns, sem sigraði Gunnar í Kaupmannahöfn í september 2019.

„Við [Gunnar] erum með mjög svipaðan stíl en ég ætti að halda ákveðinni fjarlægð frá honum en reyna svo að pressa á hann og ná inn rothöggi eða uppgjafartaki. Ég ætla að klára hann,“ sagði Takashi Sato.

MMA



Fleiri fréttir

Sjá meira


×