Mun ekki stíga aftur á völlinn það sem eftir er tíma­bilsins

Sinner hefur ekkert spilað síðan hann varði Wimbledon risamótið í júlí. Eftir læknisráðgjöf hefur hann ákveðið að hvíla restina af tímabilinu til þess að eiga möguleika á að eiga lengri feril í framtíðinni.

Hann hefur glímt við meiðsli í hnénu og mun þurfa mikla aðhlynningu til þess að ná sér aftur á strik. Hann hefur átt sigursælan feril hingað til og ætlar að gera allt sem hann getur til þess að halda honum sem lengst áfram.

Áður en hann lagðist í meiðsli hafði hann spilað frábærlega á árinu. Af öllum 47 leikjum sem hann spilaði í ár tapaði hann aðeins þremur þeirra. Þrátt fyrir það hefur Þjóðverjinn Alexander Zverev átt gott tímabil í fjarveru Sinners. Eftir að Sinner staðfesti fjarveru sína er ljóst að Zverev mun taka við af honum sem hæsti leikmaður heimslistans í tennis.

Aðalkeppinautur Sinners, Carlos Alcaraz, hefur einnig verið frá vegna meiðsla en hefur hægt og rólega verið að koma til baka. Hann náði að taka þátt á Opna bandaríska risamótinu og var gríðarlega sáttur við að vera kominn aftur á völlinn.