Trylltur dans stiginn á Þorrablóti Vesturbæjar

Guðmundur Benediktsson var veislustjóri á kvöldinu sem hófst með fordrykk klukkan 19. Borðhald hófst klukkan 20 og setið var á tíu til tólf manna borðum. Það er hópurinn KR konur sem stendur að viðburðinum en allur ágóði af kvöldinu rennur til yngri flokka starfs KR.

Snjólaug Lúðvíksdóttir var með uppistand og Bartónar, kór Kaffibarsins, söng fyrir gesti sem gæddu sér á þorramat frá Múlakaffi. Upp úr ellefu stigu svo hvítklæddu strákarnir í Björtum sveiflum á svið og er óhætt að segja að fólk hafi rokið á dansgólfið.

Selma Björnsdóttir tók nokkra slagara með strákabandinu og óhætt að segja að stemmningin hafi verið sveitt. Eftir tveggja ára djammleysi var greinilega kominn tími á að skemmta sér. Talið var í síðasta lag þegar klukkan var að verða eitt.

Fjöldi þjóðþekktra einstaklinga var á svæðinu og má nefna borgarfulltrúana Líf Magneudóttur og Hildi Björnsdóttur, Þorstein Halldórsson þjálfara kvennalandsliðsins í fótbolta, Brynju Scheving balletskólastjóra, Hörð Felix Harðarson lögfræðing, Rögnu Lóu Stefánsdóttur knattspyrnukempu, Þormóð Egilsson - stundum nefndur Herra KR, Geir Þorsteinsson fyrrverandi formann KSÍ, leikmenn meistaraflokkaliða KR og marga marga fleiri.

Erling Ó. Aðalsteinsson ljósmyndari tók myndirnar að neðan milli þess sem hann skemmti sér konunglega með öðrum vesturbæingum og velunnurum þessa rótgróna hverfis í Reykjavík.