Erlent

Gagnrýnir landsnefndina fyrir að beita sér gegn andstæðingum Trumps

Samúel Karl Ólason skrifar
Mitch McConnell, leiðtogi Repúblikana í öldungadeild Bandaríkjaþings.
Mitch McConnell, leiðtogi Repúblikana í öldungadeild Bandaríkjaþings. AP/Jacquelyn Martin

Mitch McConnell, leiðtogi Repúblikanaflokksins í öldungadeild Bandaríkjanna, gagnrýndi í kvöld landsnefnd flokksins fyrir að ávíta tvo þingmenn flokksins. Það gerði landsnefndin vegna þess að þingmennirnir tveir taka þátt í rannsókn fulltrúadeildarinnar á rannsókninni á þinghúsið í fyrra.

Þar er um að ræða þau Liz Cheney og Adam Kinzinger en bæði hafa verið mjög gagnrýnina á Donald Trump, fyrrverandi forseta. Hann og bandamenn hans innan flokksins hafa beitt sér af nokkurri hörku gegn þingmönnunum tveimur.

Landsnefnd Repúblikanaflokksins ávítti þingmennina á síðastliðin föstudag vegna aðkomu þeirrar að rannsókninni. Í ályktun nefndarinnar segir að þau taki þátt í aðför Demókrata að hefðbundnum borgurum sem hefðu „tekið þátt í lögmætri pólitískri umræðu“.

Vert er að taka fram að þann 6. janúar 2021 ruddi stór hópur stuðningsmanna Donalds Trump, fyrrverandi forseta Bandaríkjanna sér leið í gegnum tálma lögreglunnar við þinghúsið og reyndi að koma í veg fyrir formlega staðfestingu úrslita forsetakosninganna 2020. Kosninga sem Trump tapaði gegn Joe Biden.

Fimm létu lífið þennan dag og í kjölfar hans og tugir lögregluþjóna særðust í átökum við múginn.

Þegar McConnell var spurður út í ályktun Landsnefndarinnar sagði hann ekki rétt að meðlimir hennar ættu að beita sér gegn stökum þingmönnum flokksins sem hafa ekki sama sjónarmið og meirihlutinn. Hann sagðist þó bera fullt traust til Ronnu McDaniel, formanns Landsnefndarinnar, samkvæmt frétt Washington Post.

Nokkrir aðrir öldungadeildarþingmenn Repúblikanaflokksins slógu á svipaða strengi í dag og þar á meðal Susan Collins, frá Maine, sem sagði „fáránlegt“ að kalla það sem gerðist þennan dag sem „lögmæta pólitíska umræðu“.

Sjá einnig: Lögregluþjónar þingsins segja sögu sína: „Þú munt deyja á hnjánum“

Repúblikanar í öldungadeildinni komu í fyrra í veg fyrir að stofnuð yrði óháð nefnd sem ætti að rannsaka árásina á þinghúsið eftir að 35 þingmenn flokksins greiddu atkvæði með frumvarpi þar að lútandi í fulltrúadeildinni.

Þá sagði McConnell meðal annars að fella ætti frumvarpið í öldungadeildinni því Demókratar gætu notað rannsóknina og árásina til að herja á Repúblikana í komandi kosningum.

Undir miklu álagi

Eins og áður segir hafa bandamenn Trumps innan Repúblikanaflokksins beitt sér harkalega gegn Cheney og Kinzinger. Sá síðarnefndi hefur ákveðið að hætta á þingi eftir núverandi kjörtímabil en hann segist ætla að halda áfram að berjast gegn Trump og áhrifum hans á flokkinn.

Cheney er að bjóða sig aftur fram í kosningunum í nóvember á þessu ári en Trump hefur lýst yfir stuðningi við mótframbjóðenda hennar. Hún er frá Wyoming en forsvarsmenn Repúblikanaflokksins þar samþykktu í fyrra ályktun um að hún væri ekki lengur viðurkennd sem Repúblikani.

Þegar fréttakona ABC News reyndi að spyrja Kevin McCarthy, leiðtoga Repúblikana í fulltrúadeildinni, að því í kvöld hvað honum þætti um að kalla árásina á þinghúsið lögmæta pólitíska umræðu, vildi hann ekki svara. Við það gekk hann hratt á brott.


Tengdar fréttir

Tók „ástarbréfin“ frá Kim með sér til Flórída

Donald Trump, fyrrverandi forseti Bandaríkjanna, flutti fjölda gagna, bréfa og skjala úr Hvíta húsinu og í híbýli sín í Mar-a-Lago í Flórída. Starfsmenn Þjóðskjalasafns Bandaríkjanna þurftu að sækja gögnin en þau hefðu átt að vera flutt til stofnunarinnar, samkvæmt lögum.

Trump ætlar að náða ó­eirða­seggina ef hann vinnur

Donald Trump segist ætla að náða þá sem voru dæmdir vegna árásarinnar á þinghúsið þann 6.janúar í fyrra ef hann verður forseti á ný. Hann hélt fjöldafund í Texas í gær þar sem hann gældi við mögulegt forsetaframboð.

Lafhræddir Demókratar vilja drífa sig

Joe Biden, forseti Bandaríkjanna, vill tilnefna nýjan hæstaréttardómara eins fljótt og auðið er og koma tilnefningu hennar fljótt í gegnum öldungadeildina. Þar á bæ hafa Repúblikanar þegar gefið í skyn að þeir vilji draga ferlið á langinn.

„Seiðmaðurinn“ dæmdur í rúmlega þriggja ára fangelsi

Jacob Chansley, sem gengur undir nafninu Qanon seiðmaðurinn, hefur dæmdur í 41 mánaðar fangelsi fyrir aðkomu hans að árásinni á þinghús Bandaríkjanna í janúar. Dómsmálaráðuneyti Bandaríkjanna hafði farið fram á þunga refsingu til að setja fordæmi í aðdraganda fleiri dómsmála gegn fólki sem tók þátt í árásinni.

Kallaði McConnell heimskan tíkarson

Donald Trump, fyrrverandi forseti Bandaríkjanna, jós úr skálum reiði sinnar yfir Mitch McConnell, leiðtoga Repúblikana í öldungadeild Bandaríkjaþings um helgina. Það gerði Trump í ræðu á ráðstefnu íhaldsmanna í sveitaklúbbi hans í Flórída á laugardagskvöldið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.