Topparnir í tölfræðinni á móti Ungverjum: Bjarki og auðveldu mörkin í leitirnar

Íslenska karlalandsliðið í handbolta vann frábæran eins marks sigur á heimamönnum Ungverjum, 31-30, í þriðja og síðasta leik sínum í B-riðli á Evrópumeistaramótinu 2022 í Ungverjalandi og Slóvakíu.

Bjarki Már Elísson kom lítið við sögu í síðustu leikjum en hann var búinn að skora hraðaupplaupsmark eftir 37 sekúndur og átti mjög flottan leik. Bjarki nýtti 9 af 11 mörkum og skoraði fimm af níu hraðaupphlaupsmörkum Íslands í leiknum. Það má segja að Bjarki og auðveldu mörkin hafi komið í leitirnar.

Ómar Ingi Magnússon átti beinan þátt í fjórtán mörkum íslenska liðsins með átta mörkum og sex stoðsendingum. Hann fékk dæmda á sig þrjá ruðninga í lokin en spilaði nánast óaðfinnanlegan leik fram að því.

Gísli Þorgeir Kristjánsson var frábær framan af með fjögur mörk í fyrri hálfleik en hann fiskaði líka þrjú víti í leiknum og átti tvær sendingar sem gáfu víti.

Aron Pálmarsson átti sex stoðsendingar en nýtti aðeins tvö af sex skotum. Mörg skota hans voru hörmuleg, tvö langt yfir og eitt nánast gripið. Hann þarf að gera miklu meira og veit það sjálfur. Það er hins vegar frábært að vinna leik þar sem hann finnur ekki fjölina sína í skotunum.

Björgvin Páll Gústavsson varði sextán skot í markinu en þar af var víti og margir aðrir mikilvægir boltar á lokakaflanum sem skipti gríðarlega miklu máli eftir að liðið fór að gera fleiri mistök í sóknarleiknum.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum þriðja leik Íslands á mótinu.

Hér fyrir neðan má sjá toppa íslenska liðsins í tölfræðinni.