Innlent

Segir Sjúkra­tryggingar stilla tal­­meina­­fræðingum upp við vegg

Fanndís Birna Logadóttir skrifar
María Heimisdóttir, forstjóri Sjúkratrygginga Íslands, og Kristín Theodóra Þórarinsdóttir, formaður Félags talmeinafræðinga á Íslandi, líta ekki eins á stöðu mála um þessar mundir. 
María Heimisdóttir, forstjóri Sjúkratrygginga Íslands, og Kristín Theodóra Þórarinsdóttir, formaður Félags talmeinafræðinga á Íslandi, líta ekki eins á stöðu mála um þessar mundir.  Vísir/Baldur/Sigurjón

Sjúkratryggingar Íslands munu fella tveggja ára starfsreynsluákvæði úr samningi við talmeinafræðinga og verður núgildandi samningur framlengdur um sex mánuði, án ákvæðisins, og sá tími nýttur til að fara mál á borð við forgangsröðun. Formaður Félags talmeinafræðinga segist upplifa það að þeim sé stillt upp við vegg en forstjóri Sjúkratrygginga segir mikilvægt að ræða og tryggja gæði þjónustunnar. 

Tveggja ára starfsreynsluákvæði sem finna má í rammasamningi Sjúkratrygginga Íslands við sjálfstætt starfandi talmeinafræðinga verður afnumið í næsta samningi en þetta staðfestir María Heimisdóttir, forstjóri Sjúkratrygginga Íslands í samtali við fréttastofu.

Ákvæðið var upprunalega sett inn í rammasamninginn árið 2017 en gildistími samningsins rann út í lok október 2019. Frá þeim tíma hefur samningurinn verið endurnýjaður um einn mánuð í senn en viðræður um nýjan samning hafa ekki borið árangur.

Viðræðurnar hafa að mörgu leyti strandað á starfsreynsluákvæðinu en heilbrigðisráðherra fól Sjúkratryggingum fyrir rúmum mánuði að fella brott ákvæðið. Að sögn Maríu fengu þau samningsmarkmið frá ráðherra í lok desember.

Gamli samningurinn verður fyrst um sinn framlengdur um sex mánuði, þó án tveggja ára ákvæðisins, og verður sá tími nýttur til að undirbúa nýtt heildstætt samkomulag. Að sögn Maríu er nú unnið að breytingum og er vonast til að gengið verði frá framlengingunni í þessari viku.

„Við fengum samningsmarkmið frá ráðherra í lok desember þar sem var gert ráð fyrir einfaldri framlengingu með niðurfellingu á tveggja ára reglunni en svo voru þau samningsmarkmið endurskoðuð,“ segir María.

„Það komu ný markmið fyrir viku síðan þar sem var ákveðið að nota næstu sex mánuði til að vinna að ákveðnum skilmerkjum varðandi gæðavísa og forgangsröðun sjúklinga,“ segir hún enn fremur en hún segir mikilvægt að tryggja áframhaldandi traustan farveg fyrir þjónustuna.

Upplifir að talmeinafræðingum sé stillt upp við vegg

Kristín Theodóra Þórarinsdóttir, formaður Félags talmeinafræðinga á Íslandi, segir talmeinafræðinga upplifa stöðuna öðruvísi en forstjóri sjúkratrygginga lýsir. Hún segir Sjúkratryggingar setja þeim þröngar skorður gegn því að fella út ákvæðið.

„Það kemur okkur svolítið spánskt fyrir sjónir því það hefur gengið mjög treglega að setjast að samningaborðinu með Sjúkratryggingum Íslands og erfitt að hefja umræður af alvöru. Við vorum orðin svolítið óþolinmóð í byrjun árs því að klukkan tifar og þessi tilmæli voru mjög skýr frá heilbrigðisráðherra að fella út þetta ákvæði. Við vildum hefjast handa sem fyrst en þau setja okkur stífan ramma og kröfur að klára ákveðin samningsviðmið“ segir Kristín.

Hún lýsir því að talmeinafræðingum hafi verið stillt upp við vegg.

„Það er algjörlega okkar upplifun að það sé ekkert að klára þetta fyrr en það sé búið að tækla þessi stóru mál, þau krefjast lengri vinnu og þarf auðvitað að skoða, en okkur er svo sannarlega stillt upp við vegg í þessu,“ segir Kristín.

Sjúkratryggingar þurfi nú að koma til móts við talmeinafræðinga og eiga samtal við þau um framtíðina.

„Við viljum að Sjúkratryggingar sýni virkilegan vilja til að setjast að borðinu og klára þennan samning. Það er margt sem er hægt að bæta en þetta er orðið mjög þreytt og við viljum bara fá viðbrögð frá ráðuneytinu og það strax,“ segir Kristín.

Mikilvægt verkefni sem þarf að ræða

María segir aftur á móti að Sjúkratryggingar séu öll af vilja gerð en bendir á að áður en eiginlegar samningaviðræður fari fram þurfi að taka ákvörðun um framlenginguna.

„Viðræðurnar fara fyrst og fremst af stað eftir að við erum búin að skrifa undir, vegna þess að það eru í rauninni fyrirmæli ráðherra að aðilar noti næstu sex mánuði til þess að vinna með þessi gæðamál og forgangsröðunina,“ segir María.

Hún segir að viðræðurnar eigi svo sannarlega eftir að eiga sér stað, enda séu þær hluti af samningnum.

„Þetta er mjög mikilvæg þjónusta og talmeinafræðingar hafa lagt gríðarlega áherslu á að þetta ákvæði verði fellt niður. Nú hefur ráðuneytið ákveðið að svo verði og þá bara viljum við drífa í að ganga frá því og fara í það sem er ekki síður mikilvægt verkefni, að ræða gæðin og forgangsröðunina,“ segir María.


Tengdar fréttir

Tal­meina­fræðingar sitja auðum höndum á meðan bið­listinn lengist

Þann 14. desember síðastliðinn færðust stór bros yfir mörg andlit og hamingjuóskum rigndi yfir okkur, nýlega útskrifaða talmeinafræðingana, þegar frétt birtist með fyrirsögninni „Skilyrði um tveggja ára starfsreynslu talmeinafræðinga afnumið“. En hvað svo?

Getur endað með einangrun ungs fólks

Skortur á úrræðum og stuðningi við ungt fólk sem stamar getur haft afar neikvæð áhrif og stuðlað að því að ungmenni sem stama dragi sig í hlé eða endi í algjörri einangrun. Töluvert hefur borið á fyrirspurnum til Málbjargar vegna þessa en ein helsta ástæðan er sú að biðlistar eftir þjónustu talmeinafræðinga eru mun lengri en boðlegt getur talist.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.