Innlent

Hjálpræðisherinn fellir niður jólaboð sitt á aðfangadag

Eiður Þór Árnason skrifar
Hjálpræðisherinn opnaði nýjar höfuðstöðvar sínar í fyrra.
Hjálpræðisherinn opnaði nýjar höfuðstöðvar sínar í fyrra. Vísir/Vilhelm

Hjálpræðisherinn hefur ákveðið að fella niður fyrirhugað jólaboð sitt á aðfangadag í ljósi stöðu kórónufaraldursins. Rúmlega 300 gestir og sjálfboðaliðar höfðu boðað komu sína, þar af um 150 börn.

Að sögn Hjördísar Kristinsdóttur, svæðisforingja Hjálpræðishersins á Íslandi, var ákvörðunin tekin með miklum trega eftir samtal við almannavarnadeild ríkislögreglustjóra. Stjórnendur Hjálpræðishersins telji það óábyrgt og of áhættu samt að blanda saman svo mörgum úr ólíkum hópum. Þetta kemur fram í tilkynningu frá Hjálpræðishernum.

„Hjálpræðisherinn leggur áherslu á það að öll þau sem skráðu sig munu fá upplýsingar um hvernig þau geti nálgast jólagjöf, bæði fullorðnir og börn og að reynt verði eftir fremsta megni að halda áfram að þjónusta þann stóra jaðarsetta hóp sem daglega kemur og þiggur heita máltíð hjá Hernum, eins og reyndar hefur verið gert allan faraldurinn.“

Þakkar Hjálpræðisherinn öllum þeim fjölmörgu einstaklingum og fyrirtækjum sem lagt hafa söfnun í Velferðarsjóð lið með framlögum af ýmsu tagi, sérstaklega nú í desember.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×