Íslenski boltinn

Sölvi Geir tjáir sig um Fazmo: „Fight Club“ í Fossvoginum en engin glæpasamtök

Óskar Ófeigur Jónsson skrifar
Sölvi Geir Ottesen og myndbrot úr þættinum „Víkingar: Fullkominn endir“ sem er verið að frumsýna á Stöð 2 og Stöð 2 Sport þessi misserin.
Sölvi Geir Ottesen og myndbrot úr þættinum „Víkingar: Fullkominn endir“ sem er verið að frumsýna á Stöð 2 og Stöð 2 Sport þessi misserin. S2 Sport

Sölvi Geir Ottesen var í engum glæpasamtökum þegar hann var yngri þótt að margir hafi komið upp að honum og haldið það. Hann fór yfir sögu Fazmo klíkunnar í þáttunum um fullkomin endi hans og Kára Árnasonar með Víkingum.

Sölvi Geir Ottesen, fyrirliði Íslands- og bikarmeistara Víkings, var í aðalhlutverki í öðrum þætti heimildaþáttanna „Víkingar: Fullkominn endir“ sem eru frumsýndir um hverja helgi bæði á Stöð 2 og Stöð 2 Sport.

Sölvi Geir Ottesen ræðir hér Fazmo-gengið.S2 Sport

Sölvi Geir fór yfir sögu sína og þar á meðal tengsl sín við Fazmo-klíkuna. Það var mikið gert úr því í fjölmiðlum á sínum tíma að landsliðsmaður væri í henni frægu Fazmo-klíku.

Sölvi tjáði sig nú í fyrsta sinn um hvað þessi Fazmo-klíka snerist og hvernig hann blandaðist inn í hana.

Sölvi sagði frá upphafinu þegar vinirnir fóru að hittast í bílskúrnum hjá einum sem hafði útbúið góða aðstöðu fyrir vinina að koma saman eftir skóla.

Vinur hans setti meðal annars upp boxpúða og þar fóru félagarnir síðan að horfa á vídeóspólur með bardögum úr UFC. Sölvi sagðist hafa eytt mjög miklum tíma þar. Árið er 1999 og „Fight Club“ er þarna ein vinsælasta kvikmyndin.

Komust yfir UFC spólur

S2 Sport

„Við komust yfir þessar UFC spólur og við byrjum að horfa á þær og leika eftir hinu og þessu sem við sjáum á spólunum. Við höfum gaman af gannislag og við byrjum að reyna að læra þessi trix sem við sjáum á spólunum ásamt því að vera boxa hvorn annan inn í bílskúrnum,“ sagði Sölvi Geir Ottesen.

„Það eru einhverjir úr öðrum hverfum byrjaðir að frétta af þessum „Fight Club“ í Fossvoginum og þá byrja að koma einhverjir úr Breiðholtinu, einhver úr Keflavík. Þú ert fimmtán, sextán ára gamall. Þetta er ekkert gengi þetta er bara hópur af bestu vinum sem hanga saman og eru að fíflast,“ sagði Sölvi Geir.

Klippa: Víkingar, Fullkominn endir: Sölvi Geir og Fazmo gengið

Sem betur fer var Borgarspítali bara í næsta húsi

„Þar boxuðum við hina og þessa menn í bílskúrnum. Sem betur fer var Borgarspítali bara í næsta húsi, stutt leið fyrir brotna putta, brotið nef og svona. Síðan færist þetta yfir á skólaböll og síðan niður í miðbæinn. Menn eru bara öruggir með sig þegar kemur að því að þú lendir í slagsmálum. Menn bakka ekkert út úr slagsmálunum heldur bjóða þau velkomin,“ sagði Sölvi.

„Við vorum allir mjög góðir vinir á þessum tíma og þegar ég fór út í atvinnumennsku þá var gerð bloggsíða þannig að ég gæti fylgst með félögunum og hvað þeir væru að gera á Íslandi. Fljótlega eftir að ég fer til Svíþjóðar þá kemur leiðinlegt atvik þar sem einn verður illa fyrir barðinu á vinum mínum, þessum hópi,“ sagði Sölvi.

Fazmo meðlimur valinn í landsliðið

Úrklippa úr DV frá þessum tíma.Timarit.is/DV

„Fréttamiðlar komast í það. Strákarnir gera þau mistök að vera gorta sig inn á þessari bloggsíðu um hvað þeir höfðu gert umrætt kvöld. Fréttamiðlarnir komast í það og það kemur síðan í kjölfarið inn á DV að Fazmo meðlimur hafi verið valinn í landsliðið. Maður er vissulega bendlaður við þetta,“ sagði Sölvi.

„Þetta voru aldrei nein skipulögð glæpasamtök eða eitthvað svoleiðis. Þetta var bara hópur af vinum sem ákváðu að kalla sig einhverju nafni þegar þeir voru fimmtán, sextán ára og héldu sig við það. Það hafa margir komið upp að mér löngu eftir þetta og verið að tala um þetta gengi. Maður hefur heyrt misgáfulegar sögur um hvað þeir héldu að þetta gengi snerist um. Margir halda að þetta hafi verið einhver glæpasamtök en það var fjarri lagi,“ sagði Sölvi Geir.

Það má sjá Sölva ræða Fazmo-klíkuna hér fyrir ofan.

„Víkingar: Fullkominn endir“ er ný þáttaröð í fjórum hlutum þar sem við fáum innsýn í síðustu mánuðina hjá þeim Kára Árnasyni og Sölva Geir Ottesen á knattspyrnuferli þeirra ásamt því að fylgja þeim eftir á ótrúlegum lokaspretti Víkinga í sumar þar liðið varð Íslands- og bikarmeistari. Þættirnir eru sýndir samhliða á Stöð 2 Sport og Stöð 2.

Þriðji þátturinn verður sýndur um helgina, fyrst klukkan 20.20 á laugardaginn á Stöð 2 Sport og svo aftur klukkan 19.40 á sunnudaginn á Stöð tvö.


Víkingar - Fullkominn endir er heimildaþáttaröð í fjórum hlutum um Íslands- og bikarmeistara Víkings. Áskrift að Stöð 2 Sport kostar frá kr. 3.990 og má kaupa áskrift á stod2.is.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.