Veður

Líklegt að vorveður verði á rauðum jólum

Hallgerður Kolbrún E. Jónsdóttir skrifar
Nær engar líkur eru taldar á að það snjói yfir jólin.
Nær engar líkur eru taldar á að það snjói yfir jólin. Vísir/Vilhelm

Talsverðar líkur eru á því að vorveður verði yfir landinu öllu í næstu viku og fram yfir jól. Nær öruggt er í það minnsta að enginn snjór muni falla þessi jól. 

„Eins og oft vill verða á aðventunni er veðrið breytilegt en það má sjá núna um helgina að það verði stærri og meiri breytingar en bara til eins eða tveggja daga. Þær verða varanlegri og gætu mótað veðrið næstu vikuna, jafnvel fram yfir áramót,“ sagði Einar Sveinbjörnsson, veðurfræðingur, í Reykjavík síðdegis á Bylgjunni í dag. 

Hann segir að í stað þess að hin klassíska lægð, sem við íslendingar þekkjum svo vel, sé á leið hingað yfir landið úr suðvestri virðist nú háþrýstisvæði vera að magnast yfir Bretlandseyjum og geti áhrif þessa háþrýstisvæðis teygt anga sína hingað dagana fyrir jól. 

„Lægðirnar verða víðsfjarri og sennilega verður til að byrja með mild sunnanátt, strax um helgina þar sem hitinn verður fimm til tíu stig fyrir norðan og tekur upp allan snjó. Það hefur þegar gert það síðustu daga að einhverju leyti,“ segir Einar. 

„Síðan þegar hæðin kemur sér almennilega fyrir í kring um landið þá léttir líka til, það verður hæglátt og jafnvel heiðskýr himinn dag eftir dag. Það þýðir í sjálfu sér að frá og með næstu helgi þá er nánast engri úrkomu spáð á landinu. Það skiptir þá ekki máli hvort það er rigning eða snjór, það er engin úrkoma.“

„Að fá nýjan og fallegan jólasnjó, það er mjög ólíklegt“

Tvær sviðsmyndir séu nú uppi. Annars vegar að hæðin haldi sig yfir Bretlandseyjum og hlýir vindar blási frá henni yfir til Íslands. Þá verði mildar sunnanáttur og hálfgert vorveður fram yfir jól. Hitt sé að hæðin færi sig yfir til Íslands og hreiðri um sig yfir landinu. 

Einar Sveinbjörnsson veðurfræðingur.Vísir

„Þá verður það þannig að það kólnar inn til landsins, bara vegna þess að það er enginn vindur og heiður himinn og orðið dálítið frost þar á meðan hitinn er við frostmark við sjávarsíðuna.“

Fyrri sviðsmyndin er að mati Einars líklegri en sama hvað verði, allar líkur á að snjólaust verði á Íslandi þessi jól. 

„Það eru yfirgnæfandi líkur á því að það verði snjólaust á landinu öllu í næstu viku og þar með talið yfir jóladagana. Það er smá séns, þó hann sé lítill, þegar landið kólnar að það gæti snjóað með ströndinni á suðausturlandi. En að fá nýjan og fallegan jólasnjó, það er eiginlega bara mjög ólíklegt.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.