Nýtt frumvarp um bann við blóðmerahaldi lagt fram

Um 50 frumvörp hafi nú þegar verið lögð fram af hálfu Flokks fólksins, en þetta sé eitt þriggja sem sett verði í forgang. Vonast hún til að málið verði tekið til umræðu á Alþingi fyrir jól.

Takmarkaðar upplýsingar

Eins og fram hefur komið er hórmónið PMSG unnið úr blóði fylfullra hryssa sem notað er til að framleiða frjósemislyf fyrir dýr. Það er að langmestu leyti flutt út, einkum til að stilla saman gangmál og auka frjósemi húsdýra á meginlandinu. Fyrirtækið Ísteka ehf kaupir allar afurðirnar af blóðmerabændum hérlendis og veltir tæpum tveimur milljörðum króna á ársgrundvelli. Ísteka rekur einnig eigin blóðmerabú og á fjölda hryssa, samkvæmt heimildum fréttastofu, en nánari upplýsingar um starfsemi fyrirtækisins er erfitt að nálgast, enda hefur Arnþór Guðlaugsson, framkvæmdastjóri þess, hafnað öllum viðtölum þrátt fyrir ítrekuð boð þar um.

Ísland eina Evrópulandið í blóðmerabúskap

Um árabil hefur blóðmerahald verið bannað í löndum Evrópusambandsins á grunni laga um dýravernd og er Ísland eina landið í Evrópu þar sem greinin er stunduð. Dýraverndarsamtök hafa reynt að beita þrýstingi til að banna innflutning lyfja sem framleidd eru úr merablóði frá ríkjum utan ESB, til að mynda Argentínu og Úrúgvæ. Málið hefur hlotið áheyrn Evrópuþingsins sem ályktaði nú síðast í október um að hvetja framkvæmdastjórn ESB til að banna innflutning á PMSG, en mikil vinna er nú lögð í að auka sjálfbærni í landbúnaði í ríkjum sambandsins. Umræðan fór einnig fram í apríl á þessu ári en þá svaraði framkvæmastjórnin því til að innflutningsbann á lyfinu stæði ekki til að svo stöddu.

Sérstök ákvæði um nærgætni og hvíld

Inga Sæland lagði fram á Alþingi sambærilegt frumvarp og greint er frá hér að ofan fyrr á þessu ári, orðalag var með aðeins öðrum hætti og greinargerð með frumvarpinu önnur. Það frumvarp hlaut ekki brautargengi. Atvinnuveganefnd Alþingis bárust 13 umsagnir um frumvarpið frá ýmsum hagsmunaaðilum, félögum, einstaklingum og Matvælastofnun. 

Umsagnirnar voru allar á þann veg að blóðtaka úr fylfullum hryssum, stangaðist ekki á við íslensk lög um velferð dýra, þvert á móti að velferðarsamningar Ísteka við bændur stuðluðu að betri meðferð og umhirðu dýra.

Ísteka kveður dýravelferðarsamninga byggja á skilyrðum Matvælastofnunar og Fagráðs um dýravelferð sem sett eru í samræmi við nýjustu lög og reglugerðir. Orðrétt segir í umsögn: „Þar er meðal annars að finna sérstök ákvæði um nærgætni í umgengni og hvíld hrossanna, ákvæði um gott beitiland og aðgang að vatni og saltsteinum. Sérstök ákvæði eru einnig dýravelferðarsamningnum um góða aðstöðu þar sem blóðgjöf fer fram.“

Í umsögn Ísteka segir jafnframt að vel sé fylgst með heilsu hryssanna eftir blóðgjöf og rannsóknir hafi sýnt að hún hafi ekki neikvæð áhrif á heilsu þeirra. Fréttastofan hefur óskað eftir nánari upplýsingum um þá rannsókn sem hér er getið um til staðfestingar á þessari fullyrðingu, en fyrirtækið hefur ekki svarað erindinu.

Meðflutningsmenn Ingu að framlagningu frumvarps um bann við blóðmerahaldi nú eru aðrir þingmenn Flokks fólksins auk tveggja þingmanna Vinstri grænna, þeirra Jódísar Skúladóttur og Orra Páls Jóhannssonar.