Enn eitt metið var slegið í gær þegar smituðum fjölgaði um 206 innanlands og 9 á landamærunum. Nú eru 25 á sjúkrahúsi, þarf af fjórir á gjörgæslu og af þeim þurfa tveir á öndunarvél að halda. Sóttvarnalæknir segir miklu meiri líkur á að óbólusettir smitist, að þeir smiti aðra og leggist lengur alvarlega veikir inn á spítala en óbólusettir.

Það hafi þó ekki verið rætt að veita bólusettum meira frelsi umfram óbúlusetta með framvísun bólusetningarvottorða eins og gert hafi verið víða annars staðar á meðan bólusettir væru einnig að smita út frá sér. Það gæti breyst ef örvunarskammturinn skili tilætluðum árangri.

„Þá held ég að menn geti farið að skoða hvort það sé hægt að auka frelsi eða minnka takmarkanir á þá sem eru virkilega vel bólusettir og eru ólíklegir til að smitast og þannig smita aðra. Við þurfum að skoða þetta út frá þeim sjónarhóli,“ segir Þórólfur.

Danir og fleiri þjóðir hafa hins vegar beitt þeirri leið í faraldrinum að fólk þurfi að framvísa bólusetningarvottorði eða vottorði um að hafa jafnað sig á covid til að komast inn á opinbera staði og í almenningssamgöngur.

Katrín Jakobsdóttir forsætisráðherra og Sigurður Ingi Jóhannsson samgönguráðherra segja þessa leið hafa verið farna á landamærunum hér á landi.

„Mér hefur alveg þótt það áhugavert að við myndum fara að skoða það hér innanlands í ljósi þess að geta þá haft minni takmarkanir á okkur öllum hinum sem erum bólusett og erum þar af leiðandi í minni áhættu. Bæði með að smitast og að smita aðra,“ segir Sigurður Ingi.

Forsætisráðherra segir aðgerðir Íslendinga hafa skilað góðum árangri og þeir standi framarlega varðandi árangur í bólusetningum og fáum dauðsföllum. Í dag þurfi bæði bólusettir og óbólusettir að sýna niðurstöðu hraðprófs á tilteknum viðburðum.

„Þetta er auðvitað spurning og álitamál sem vekur upp ýmsar bæði siðferðilegar og pólitískar spurningar. Við erum opið, frjálslynt lýðræðissamfélag sem eins og ég segi hefur reitt sig á upplýsingamiðlun,“ segir Katrín.

Þess vegna hvetji stjórnvöld fólk til að þiggja bæði almenna bólusetningu og nú örvunarskammtinn sem dragi mjög úr líkum á alvarlegum veikindum.