Veður

Vindur blæs úr ýmsum áttum á næstu dögum

Atli Ísleifsson skrifar
Spáð er vestan átta til fimmtán metrar á sekúndu sunnanlands í dag, en annars yfirleitt hægari vindur.
Spáð er vestan átta til fimmtán metrar á sekúndu sunnanlands í dag, en annars yfirleitt hægari vindur. Vísir/Vilhelm

Á næstu dögum verða lægðir nærri landinu eða yfir því og mun því vindur blása úr ýmsum áttum af mismunandi styrk og úrkoma með köflum fylgja með. Veðrið getur sömuleiðis verið mjög mismunandi milli landshluta.

Spáð er vestan átta til fimmtán metrar á sekúndu sunnanlands í dag, en annars yfirleitt hægari vindur. Víða él, en þurrt norðaustantil á landinu. Hiti verður á bilinu núll til fjögur stig.

Vetrarfæri er í flestum landshlutum með snjóþekju, hálku eða hálkublettum. Í höfuðborginni féll snjór víða í efri byggðum og í tilkynningu frá Vegagerðinni segir að þar sé víða hálka eða hálkublettir.

Í hugleiðingum veðurfræðings segir að það verði ört vaxandi norðvestanátt í kvöld á Norður- og Austurlandi með snjókomu eða éljum, fimmtán til 23 metrar á sekúndu á þessum slóðum í nótt. Hægari vindur á Suður- og Vesturlandi og léttir til. Kólnandi veður.

„Á morgun verður veðrið á landinu tvískipt og mikill munur milli viðkomandi landshluta. Á vestanverðu landinu verður fremur hæg breytileg átt og léttskýjað, hið fallegasta veður. Austantil er hinsvegar útlit fyrir norðvestan hvassviðri eða storm með éljum, en lægir smám saman og léttir til síðdegis á þessum slóðum. Frost 1 til 7 stig á landinu á morgun.

Annað kvöld verður verður orðið skaplegt á Norður- og Austurlandi, en þá nálgast úrkomubakki sunnanvert landið og því má reikna með að seint annað kvöld verði slydda eða snjókoma sunnanlands með austan strekkingi og hitinn mjakast uppávið.“

Spákortið fyrir klukkan 15 í dag.Veðurstofan

Veðurhorfur næstu daga

Á miðvikudag: Breytileg átt 3-10 m/s og léttskýjað um landið sunnan- og vestanvert. Norðvestan 10-18 og lítilsháttar él austanlands, en lægir og léttir til þar síðdegis. Frost 1 til 7 stig. Gengur í austan 5-13 sunnan- og suðvestanlands um kvöldið með snjókomu eða rigningu og hita kringum frostmark.

Á fimmtudag: Austlæg eða breytileg átt 3-10, en norðaustan 8-13 á Vestfjörðum. Rigning eða slydda með köflum á suðurhelmingi landsins og hiti 1 til 5 stig. Dálítil él um landið norðanvert og frost 0 til 5, bætir í ofankomu undir kvöld.

Á föstudag: Breytileg átt, yfirleitt á bilinu 5-10 m/s. Víða él, en skúrir við suðurströndina. Hiti kringum frostmark.

Á laugardag: Norðlæg átt og dálítil él norðantil, en bjart sunnan heiða. Frost 0 til 7 stig.

Á sunnudag og mánudag: Vestlæg átt og rigning eða slydda með köflum á vestanverðu landinu, en þurrt austanlands. Hlýnandi veður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.