Handbolti

„Það er svo gaman að hún sé komin aftur til baka“

Óskar Ófeigur Jónsson skrifar
Morgan Marie Þorkelsdóttir var frábær í sigri á Haukum.
Morgan Marie Þorkelsdóttir var frábær í sigri á Haukum. Vísir/Bára Dröfn

Mariam Eradze og Morgan Marie Þorkelsdóttir komu báðar sterkar inn eftir erfiða viku Valsliðsins

Kvennalið Vals missti í síðustu viku út einn sinn allra besta leikmann þegar landsliðskonan Lovísa Thompson ákvað að taka sér hvíld frá handbolta af persónulegum ástæðum.

Valsliðið þjappaði sér saman og vann góðan sigur á Haukum í fyrsta leik eftir þessa erfiðu viku á Hlíðarenda.

Seinni bylgjan fór yfir sigur Vals og sérfræðingarnir nefndu þar sérstaklega frammistöðu tveggja leikmanna Valsliðsins. Leikmennirnir eru þær Mariam Eradze og Morgan Marie Þorkelsdóttir sem voru saman með ellefu mörk í leiknum.

Klippa: Seinni bylgjan: Mariam og Morgan komu báðar sterkar inn eftir erfiða viku Valsliðsins

„Það var ótrúlega gaman að horfa á þær og ég vil hrósa Mariam og Morgan fyrir að koma ótrúlega sterkar inn. Eins og Mariam með seinni bylgjunni þá er mikilvægt fyrir Valsliðið að fá auðveldu mörkin úr seinni bylgjunni þegar Mariam er að koma á ferðinni,“ sagði Sunneva Einarsdóttir, sérfræðingur í Seinni bylgjunni.

„Það er rosalega erfitt að stoppa hana, því hún er með frábær skot og sér línuna líka. Það er gaman að sjá Morgan líka. það er langt síðan hún var í deildinni en það er ótrúlega gaman að sjá að það er eins og hún hafi engu gleymt,“ sagði Sunneva.

„Það er svo gaman að hún sé komin aftur til baka og hún var að skila einstaklega góðum leik,“ sagði Svava Kristín Grétarsdóttir, umsjónarmaður Seinni bylgjunnar.

„Ég get alveg verið hreinskilin með Morgan að maður veit ekki alltaf hvað maður fær. Hún er smá jójó og svo koma svona glimrandi leikir hjá henni. Varnarleikurinn hjá henni var góður og small mjög vel við það sem var búið að vera úi gangi. Við sjáum það á þessum klippum að þetta eru regnbogansmörk sem eru að koma frá henni,“ sagði Anna Úrsúla Guðmundsdóttir, sérfræðingur í Seinni bylgjunni.

„Hún er að taka skot utan af velli og hún er að prjóna sig í gegn. Hún er að feika sendingar. Þetta skilaði rosalega miklu og ég var rosalega stolt af því að sjá hana hérna. Mér fannst hún koma vel inn í þessum leik,“ sagði Anna Úrsúla.

Það má heyra allt spjallið úr Seinni bylgjunni um þær Mariam og Morgan Marie hér fyrir ofan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.