Fótbolti

Sjö breytingar á byrjunarliðinu og þær Cecilía, Amanda og Sif koma allar inn

Óskar Ófeigur Jónsson skrifar
Amanda Andradóttir á ferðinni á Laugardalsvelli gegn Evrópumeisturum Hollands, í sínum fyrsta A-landsleik en í kvöld er hún í byrjunarliðinu í fyrsta sinn.
Amanda Andradóttir á ferðinni á Laugardalsvelli gegn Evrópumeisturum Hollands, í sínum fyrsta A-landsleik en í kvöld er hún í byrjunarliðinu í fyrsta sinn. VÍSIR/HULDA MARGRÉT

Þorsteinn Halldórsson, þjálfari íslenska kvennalandsliðsins í knattspyrnu, gerir sjö breytingar á byrjunarliðinu sínu fyrir leikinn á móti Kýpur í undankeppni HM 2023 sem fer fram á Laugardalsvellinum í kvöld.

Það eru aðeins fjórir leikmenn liðsins sem halda sæti sínu frá því í 4-0 sigrinum á Tékklandi á föstudaginn en það eru þær Guðný Árnadóttir, Dagný Brynjarsdóttir, Karólína Lea Vilhjálmsdóttir og Sveindís Jane Jónsdóttir.

Elísa Viðarsdóttir, Ingibjörg Sigurðardóttir, Alexandra Jóhannsdóttir og Svava Rós Guðmundsdóttir komu allar inn á sem varamenn í þeim leik en þær eru í byrjunarliðinu í dag.

Hin sautján ára gamla Amanda Jacobsen Andradóttir er í byrjunarliðinu í fyrsta sinn og Sif Atladóttir mun í kvöld spila sinn fyrsta A-landsleik í rúm tvö ár. Sif lék síðast með íslenska A-landsliðinu í leik á móti Lettlandi 8. október 2019. Sif er fyrirliði liðsins í kvöld.

Hin átján ára Cecilía Rán Rúnarsdóttir er í markinu hjá íslenska liðinu í kvöld. Þetta er hennar fjórði A-landsleikur en í fyrsta sinn sem hún er í byrjunarliðinu í keppnisleik.

Leikmennirnir sem missa sæti sitt í byrjunarliðinu eru þær Sandra Sigurðardóttir, Glódís Perla Viggósdóttir, Gunnhildur Yrsa Jónsdóttir, Berglind Björg Þorvaldsdóttir, Hallbera Guðný Gísladóttir, Agla María Albertsdóttir og Guðrún Arnardóttir.

Þær áttu flestar mjög góðan leik á móti Tékkum en Þorsteinn ætlar greinilega að nýta tækifærið og gefa fleiri leikmönnum möguleika á að sýna sig og sanna.

Þetta þýðir að sex leikmenn íslenska byrjunarliðsins í kvöld, meirihluti liðsins, eru fæddar á þessari öld eða árið 2000 eða síðar.

Íslenska liðið á að vinna leikinn í kvöld en kýpversku stelpurnar eru búnar að tapa síðustu tveimur leikjum sínum 8-0 þar af öðrum þeirra á móti Tékkum sem íslenska liðið vann 4-0 í Laugardalnum á föstudagskvöldið.

  • Byrjunarlið Íslands á móti Kýpur í undankeppni HM:
  • Cecilía Rán Rúnarsdóttir
  • Guðný Árnadóttir
  • Ingibjörg Sigurðardóttir
  • Sif Atladóttir, fyrirliði
  • Elísa Viðarsdóttir
  • Alexandra Jóhannsdóttir
  • Dagný Brynjarsdóttir
  • Karólína Lea Vilhjálmsdóttir
  • Sveindís Jane Jónsdóttir
  • Svava Rós Guðmundsdóttir
  • Amanda Jacobsen Andradóttir
Vísir/Vilhelm
Vísir/Vilhelm
Vísir/Vilhelm
Vísir/Vilhelm
Vísir/Vilhelm



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.