Handbolti

Teitur hafði betur í Íslendingaslag

Hjörtur Leó Guðjónsson skrifar
Teitur Örn Einarsson skoraði eitt mark fyrir Kristianstad í dag.
Teitur Örn Einarsson skoraði eitt mark fyrir Kristianstad í dag. Alex Nicodim/NurPhoto via Getty Images

Bjarni Ófeigur Valdimarsson og félagar hans í Skövde heimsóttu Teit Örn Einarsson og félaga í Kristianstad í sænska handboltanum í dag. Eftir jafnan og spennandi fyrri hálfleik tóku Teitur og félagar forystuna og unnu að lokum góðan tveggja marka sigur, 26-24.

Liðin skiptust á að skora í upphafi leiks og það var lítið sem ekkert sem gat skilið þau að. Þegar flautað var til hálfleiks höfðu heimamenn í Kristianstad eins marks forystu, 12-11.

Teitur og félagar mættu ákveðnir til leiks í seinni hálfleik, og þega um tuttugu mínútur voru til leiksloka var munurinn orðinn fimm mörk. 

Heimamenn héldu Bjarna og félögum í hæfilegri fjarlægð næstu mínútur og þegar fimm mínútur voru eftir af leiknum var staðan 24-21.

Skövde náði þó aldrei að brúa bilið og niðurstaðan varð tveggja marka sigur Kristianstad, 26-24. Teitur Örn skoraði eitt mark fyrir heimamenn og Bjarni Ófeigur gerði þrjú mörk fyrir gestina.

Þetta var fyrsti sigur Kristianstad á tímabilinu, en liðið er nú með fjögur stig eftir jafn marga leiki. Bjarni Ófeigur og félagar í Skövde hafa aðeins sótt tvö stig í sínum fyrstu leikjum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.