Innlent

Kærendur talningar í Norðvesturkjördæmi vilja ógilda kosningar í kjördæminu

Heimir Már Pétursson skrifar
Magnús Davíð Norðdahl afhentir Willum Þór Þórssyni kæru vegna talningar atkvæða í Norðvesturkjördæmi um að kosningarnar þar verði ógiltar.
Magnús Davíð Norðdahl afhentir Willum Þór Þórssyni kæru vegna talningar atkvæða í Norðvesturkjördæmi um að kosningarnar þar verði ógiltar. Vísir/Vilhelm

Magnús Davíð Norðdahl frambjóðandi í fyrsta sæti Pírata í Norðvesturkjördæmi í kosningunum á laugardag vill að kosningarnar í kjördæminu verði ógiltar og kosið aftur. Hann afhenti Alþingi kæru þessa efnis í dag sem frambjóðandi í kjördæminu, almennur kjósandi og sem umboðsmaður Pírata í málinu.

Magnús Davíð Norðdahl segir telur brýnt að Alþingi taki sem fyrst á efni kærunnar.Vísir/Vilhelm

„Við teljum að hver og ein málsástæða sem tilgreind er í kærunni, hvað þá heldur allar saman, eigi að leiða til þess að það beri að ógilda kosningarnar í Norðvesturkjördæmi og kjósa að nýju," segir Magnús Davíð.

Hafa beri í huga að heilindi kosningakerfisins séu undir í málinu. Uppspretta valdsins væri í þingkosningum og löggjafarvaldið velji síðan framkvæmdavaldið sem síðan skipi dómsvaldið.

„Þannig að það er ansi mikið undir. Og það er auðvitað bagalegt að við skulum vera í þessari stöðu en ég trúi því og treysti að þingmenn muni skoða þetta mál af fullri alvöru og sanngirni og komast að réttri niðurstöðu,“ segir Magnús Davíð.

Willum Þór Þórsson starfandi forseti Alþingis.Vísir/Vilhelm

Willum Þór Þórsson starfandi forseti Alþingis tók við kærunni en taldi að hún ætti að berast dómsmálaráðuneytinu og koma þaðan til þingsins. Magnús Davíð hafði áður einnig afhent ráðuneytinu kæruna. Willum minnti einnig á að kærufrestur vegna kosninganna væri fjórar vikur.

„Staðan er auðvitað sú að það er mikil óvissa og það er rétt að reyna að flýta þessu ferli eins og hægt er til að eyða þeirri óvissu sem er til staðar. Ég held að óvissan sem nú er sé bagaleg fyrir okkur öll. Frambjóðendur og kjósendur í þessu landi," sagði Magnús Davíð. En Landskjörstjórn mun koma saman klukkan fjögur í dag ti að úthluta kjörbréfum.

Willum Þór fer með stjórn Alþingis sem starfandi forseti þess fram að fyrsta þingfundi. Hann segir ekki hægt að skipa formlega í undirbúningskjörbréfanefnd fyrr en Landskjörstjórn hafi lokið sínu verki eftir fund klukkan fjögur í dag. Honum lítist ekki vel á þessa stöðu mála.

Þingflokkur Vinstri grænna kom saman til fundar um klukkan eitt til að skipa fulltrúa í kjörbréfanefnd.Vísir/Vilhelm

„Þetta er bara vont mál en undirbúningskjörbréfanefndin hefur starfað áður og það er ýmislegt sem þarf að fara yfir og við sinnum bara þeirri ábyrgð og skyldu okkar,“ segir Willum. Hann muni síðan kalla eftir formlegum tilnefningum í kjörbréfanefnd strax að loknum úthlutunarfundi Landskjörstjórnar. Kjörbréfanefndin hefji þá störf fljótlega eftir helgi.

Þingflokkur Pírata fundaði um stöðu mála í morgun og hefur ákveðið að Björn Leví Gunnarsson ný endurkjörinn þingmaður í Reykjavíkurkjördæmi norður verði fulltrúi flokksins í kjörbréfanefnd sem fer yfir kjörbréf þingmanna og undirbýr fyrir atkvæðagreiðslu í þinginu.

Þingflokkur Sjálfstæðisflokksins kom saman til fundar í dag til að skipa fulltrúa í kjörbréfanefnd og fara yfir stöðuna í stjórnarmyndunarviðræðum.Vísir/Vilhelm

Áður hafði þingflokkur Samfylkingarinnar skipað Þórunni Sveinbjarnardóttur nýkjörinn þingmann í Suðvesturkjördæmi í nefndina og þingflokkur Framsóknarflokksins skipar Líneik Önnu Sævarsdóttur endurkjörinn þingmann í Norðausturkjördæmi og Hafdísi Hrönn Hafsteinsdóttur nýkjörinn þingmann í Suðurkjördæmi í nefndina.

Þingflokkar Sjálfstæðisflokks og Vinstri grænna komu saman til fundar um klukkan eitt til að ákveða um skipan sinna fulltrúa. Miðflokkurinn og Viðreisn fá áheyrnarfulltrúa í nefndina sem er skipuð eftir styrk flokka og verður Hanna Katrín Friðriksson ný endurkjörinn þingmaður Viðreisnar áheyrnarfulltrúi hennar. Ekki liggur fyrir hver situr fundi nefndarinnar fyrir Miðflokkinn né hvern Flokkur fólksins ætlar að skipa í nefndina.


Tengdar fréttir

Tveir flokkar fá ekki sæti í kjör­bréfa­nefnd

Á morgun kemur í ljós hverjir munu sitja í kjör­bréfa­nefnd Al­þingis, sem mun þurfa að leysa þá flóknu stöðu sem upp er komin eftir endur­talninguna í Norð­vestur­kjör­dæmi. Á­kall er uppi um að störf nefndarinnar fari fram fyrir opnum tjöldum.

Mjög mikil­vægt að nefndin sé hlut­laus

Starfandi for­seti Al­þingis segir mikil­vægt að kjör­bréfa­nefnd njóti trausts og sé hlut­læg. Hann telur að það yrði erfitt fyrir jöfnunar­þing­menn eða þing­menn Norð­vestur­kjör­dæmis að taka sæti í nefndinni.

Fimm á­stæður fyrir að endur­taka kosningarnar í heild sinni

Eins og fram kom í fréttum í gær hefur Mannréttindadómstóllinn þegar komist að því að kerfi þar sem þingmenn úskurði sjálfir um lögmæti kjörs síns standist ekki 3. grein I. viðauka við lögfestan Mannréttindasáttmála Evrópu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×