Jafnteflið gegn Val var vendipunkturinn á tímabilinu

„Það er ótrúlegt hvað við höfum afrekað á þessum þremur árum. Það er ekki bara hvað við höfum gert sem einstaklingar heldur höfum við fengið alla með okkur í lið. Mér finnst eins og allir landsmenn séu á okkar bandi.“ 

„Þetta sýnir okkur hvað fótbolti er frábær íþrótt þegar þú spilar hana rétt. Ég er ekki að tala um hvað maður gefur margar sendingar í leik. Ég er að tala um þegar maður leggur líf og sál í verkefnið,“ sagði Arnar Gunnlaugsson eftir leik.

Eftir að Víkingur gerði jafntefli gegn Val 1-1 fór Arnar að trúa því að þetta gæti verið árið sem Víkingur yrði Íslandsmeistari.

„Mér fannst Vals leikurinn á Origo vellinum bera þess merki. Við jöfnuðum leikinn á síðustu mínútu. Hefði það ekki tekist hefði Valur verið með stærra forskot á okkur.“ 

„Það er erfitt að vinna þessi stóru lið og þegar við náðum stig á móti Val, fannst mér eins og það gæti eitthvað gerst.“

Víkingur gerði fyrsta markið í dag og var það afar mikilvægt að mati Arnars til að róa taugarnar.

„Fyrsta markið róaði alla niður. Mér fannst fyrri hálfleikurinn stórkostlegur,“ sagði Arnar að lokum.