Innlent

Brynjar kominn í rafskútubann eftir byltuna

Tryggvi Páll Tryggvason skrifar
Brynjar er með vænt glóðurauga eftir byltuna.
Brynjar er með vænt glóðurauga eftir byltuna. Vísir

Brynjar Níelsson alþingismaður segir að á hans heimili sé búið að setja blátt bann við frekari rafskútunotkun, eftir að hann rotaðist við notkun á slíku tæki á dögunum. Hann varar við rafskútunotkun að kvöldi til, nú þegar farið er að dimma.

Greint var frá því á dögunum að Brynjar hefði verið á leið frá Valhöll, höfuðstöðvum Sjálfstæðisflokksins, á laugardagskvöldið, á rafskútu er hann datt kylliflatur. Brynjar ræddi slysið í smáatriðum í Bítinu í morgun.

„Ég fór á rafskútu, stutta leið en það var komið myrkur, skyggni lélegt,“ sagði Brynjar sem viðurkenndi í samtali við mbl.is í vikunni að hafa verið búinn að fá sér einn til tvo bjóra um kvöldið.

Man síðast eftir því að hafa farið yfir ójöfnu

„Ég ætla nú að bara, öfugt við marga, taka ábyrgð á þessu sjálfur. Ég ætla ekki að kenna borginni um lélega kanta og ríkinu um eitthvað. Ég bara sit uppi með þessa ábyrgð sjálfur, að fara ekki nógu varlega,“ sagði Brynjar en hlusta má á viðtalið í heild sinni hér fyrir neðan.

Slysið átti sér stað við Kringlumýrarbraut, þar sem Brynjar nágaðist umferðareyju.

„Síðasta sem ég man þá fer ég í svona ójöfnu, einhver svona smá hola, bara af því að ég fór ekki nógu varlega.“

Fórstu geyst kannski?

„Nei, ég er eiginlega búinn að hægja alveg á mér þarna. Að því að ég er kominn út að gatnamótum, ég er á gatnamótum.“

Og dettur?

„Og dettur, Svo man ég ekki meir.“

Fyrr en?

Gulli Helga þurfti að aðstoða Brynjar við að reima að viðtali loknu.Vísir

„Fyrr en lögregla og sjúkraflutningamenn eru að stumra yfir mér.“

Þá varstu búinn að liggja kaldur í tíu mínútur?

„Örugglega svona fimm til tíu mínútur, já.“

Gulli Helga þurfti að reima fyrir hann

Brynjar var færður í sjúkrabíll sem flutti hann á Landspítalann til skoðunar.

„Upp á spítala, myndaður í bak og fyrir og svo bara sendur heim með verkjalyf. Og er búinn að vera á þeim síðan,“ sagði Brynjar. 

Brynjar segir andlitið meira og minna hafa orðið fjólublátt en eins og sjá má myndinni hér efst skartar hann myndarlegu glóðurauga.

„Það var nú haft á því orði eftir þetta að ég sé nú heldur skýrari í kollinum eftir slysið og líti jafn vel betur út, sagði Brynjar.“

Gerðist á versta tíma enda kosningabaráttan í fullum gangi

Það sem háir honum þó mest í kosningabaráttunni, en Brynjar er í þriðja sæti Sjálfstæðisflokksins í Reykjavíkurkjördæmi norður, þessa dagana er að í slysinu brákaði hann rifbein, sem hefur ýmis áhrif á daglegar athafnir. Til að mynda þyrfti Gulli Helga útvarpsmaður að aðstoða Brynjar við að koma sér í skó að viðtalinu loknu, eins og sjá má á meðfylgjandi mynd.

Brynjar segist vanur rafskútunotandi, en slysið mun hafa sínar afleiðingar.

„Ég er þaulvanur rafskútumaður. Ég nota þetta mikið en það er búið að banna þetta á mínu heimili núna.“

Skilaboð einhver til þjóðarinnar?

„Skilaboðin eru í fyrsta lagi að vera ekki í þessu í myrkri. Þú sérð nú ekki mikið í myrkri. Og bara að fara eins og maður segir fólki öllu, að fara varlega.“

En þú varst að því?

„Ég hef greinilega ekki farið nógu varlega. Þetta er bara eins og í öllu, hvort sem þú ferð á fjöll eða ert í reiðhjólum eða hvað sem er. Þú ert alltaf meira og minna óvarinn. Auðvitað gerast óhapp en við verðum auðvitað að bera ábyrgð á þessu sjálf og bara passa okkur.“

Það er búið að banna þér að fara á svona en ef að þú tækir með þér hjálm, heldurðu að þú fengir leyfi til að fara á þetta aftur.

„Mér sýnist bannið vera algjört á mínu heimili,“ sagði Brynjar.

Öruggast að vera bara heima

„Það er margt hættulegt í lífinu og menn verða bara að bera ábyrgð á sér sjálfir,“  sagði Brynjar. 

„Ég er ekki að tala um að það eigi að fara að banna þetta eða neitt. Ég er bara að tala um það að það er ekki skynsamlegt að vera á þessu í myrkri eða við erfiðar aðstæður.“

Er það þá bara leigubíll næst?

„Jájá, eða bara vera heima hjá sér. Það er auðvitað lang öruggast að vera heima hjá sér. Þá sleppur lifandi út úr þessu svona.“


Tengdar fréttir

Alveg galin hugmynd að fara að banna Hopp um helgar vegna fyllerís

Framkvæmdastjóri Hopp, stærsta rafskútufyrirtækis á landinu, telur „alveg galið“ að fara að banna rafskútur um helgar til þess að forðast slys vegna ölvunar. Sú hugmynd var sett fram í nýrri skýrslu um umferðaröryggi sem unnin var fyrir Reykjavíkurborg.

Há­­marks­­hraði raf­­hlaupa­hjóla gæti lækkað á vissum svæðum

Höfundum skýrslunnar Rafs­kútur og um­ferðar­öryggi sem gerð var fyrir Vega­gerðina og Reykja­víkur­borg telja æski­legt að há­marks­hraði raf­hlaupa­hjóla verði lækkaður á á­kveðnum svæðum í borginni. Þeim þykir þá vel koma til greina að leyfa um­ferð hlaupa­hjólanna á götum þar sem há­marks­hraðinn er 30 kíló­metrar á klukku­stund.

Um fimmti hver Reyk­víkingur notar raf­hlaupa­hjól

Tæplega nítján prósent Reykvíkinga nota rafhlaupahjól eitthvað og tæp sex prósent nota þau einu sinni í viku eða oftar. Notkunin er mest í aldurshópnum 18 til 24 ára og virkustu notendurnir eru búsettir í Háaleiti/Bústöðum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×