Ég ræð ekki eða rek þjálfara hjá Val

„Mér fannst þetta í sjálfu sér þetta vera framför frá leiknum á móti Vestra. Við fengum góða möguleika á því í stöðunni 1-1 til að komast yfir. Við vorum sjálfum okkur verstir, að missa boltann allan leikinn á slæmum stöðum og hleypa þeim í hraðar sóknir,“ sagði Heimir í leikslok. 

Valur hefur tapað síðustu þremur leikjum í deildinni og virðist sem liðið bíði eftir að komast í frí.

„Það er erfitt að lesa í það en það virkar þannig.“

Aðspurður hvað Heimir telur hafa farið úrskeiðis hjá Völsurum undanfarið svaraði Heimir þessu: 

„Það er alltaf þannig í fótbolta að búa til velgengni er eitt, að viðhalda velgengni það er miklu erfiðara. Og til að viðhalda henni þarf maður að sýna ákveðna auðmýkt gagnvart leiknum og við höfum síðust 6-7 vikurnar ekki sýnt þessa auðmýkt. Við höfum verið að mæta í leiki 70% og ætlað að bíða og sjá hvað andstæðingurinn ætlar að gera og þegar þú byrjar á því þá er erfitt að snúa til baka.“

Næsti leikur Vals er á móti Fylki og vill Heimir vinna þann leik.

 „Við þurfum að klára þetta af einhverju viti og mæta í þann leik og vinna hann. Ég get alveg sagt það núna að ef við töpum síðasta leiknum þá heldur það áfram inn í næsta vetur og við lendum bara í vandræðum áfram.“

Nú hefur orðrómur um stöðu Heimis verið í gangi og margir að velta fyrir sér framtíð hans hjá félaginu. 

„Ekki hugmynd. Ég ræð ekki eða rek þjálfara hjá Val. Ég vísa í stuðningsyfirlýsinguna. Auðvitað vil ég vera áfram. Það er ekki spurning. Það vill enginn enda þetta svona.“

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.