Innlent

Íslendingur á leið á norska Stórþingið

Berghildur Erla Bernharðsdóttir skrifar
Hinn hálf íslenski Mímir Kristjánsson er á leið inn á norska stórþingið fyrir Rauða- flokkinn.
Hinn hálf íslenski Mímir Kristjánsson er á leið inn á norska stórþingið fyrir Rauða- flokkinn. Vísir

Rauði flokkurinn sem er lengst til vinstri í norskum stjórnmálum vann stórsigur í þingkosningunum í Noregi í gær. Flokkurinn fékk átta menn kjörna en fékk einn í síðustu kosningum. Meðal þeirra sem var kosinn í gær er hálfíslenskur karlmaður búsettur í Stafangri.

Vinstri blokkinn hlaut hundrað þingsæti í norsku þingkosningunum í gær en hægri blokkin 68. Verkamannaflokkurinn er sá fjölmennasti á þingi með 48 þingmenn.

Jonas Gahr Støre, formaður norska Verkamannaflokksins, var sigurreifur er hann ávarpaði flokksmenn sína eftir að ljóst var að vinstri blokkinn í norskum stjórnmálum hafði unnið sigur í gærkvöldi.

Þar með er átta ára tíð Ernu Solberg á enda og ljóst að vinstri flokkar taka við stjórnartaumunum. Vinstri blokkinn samanstendur af Verkamannaflokknum, Miðflokknum, Vinstri sósíalistum, Græningjum og Rauða flokknum. 

Á íslenskan föður

Hinn hálfíslenski Mímir Kristjánsson sem er búsettur í Stavangri er á leið á þing eftir sigur Rauða flokksins í gær. Faðir hans er íslenskur og móðir hans norsk. Hann hefur ávallt búið í Noregi en talar ágæta íslensku. Mímir sem er rithöfundur og blaðamaður var í fyrsta sæti fyrir Rauða flokkinn í Rogalandi sem er í Vestur-Noregi. 

„Við fengum 4,7 prósent atkvæða og átta menn kjörna á norska stórþingið sem er stórsigur fyrir Rauða flokkinn en við vorum með einn mann á þingi fyrir þessar kosningar. Það er mikil vinstri hreyfing í Noregi um þessar mundir, fólk er búið að fá nóg af því að hinir ríku verði sífellt ríkari og þeir fátæku fátækari eins og hefur verið tilhneiging í stjórnartíð Ernu Solberg. Almenningur vill breyta þessu,“ segir Mímir. 

Velferðarmálin

Mímir telur að hann sé fyrsti Íslendingurinn sem fer á norska stórþingið. Hann segir að sín helstu baráttumál verði velferðarmál.

„Það þarf að huga betur að heilbrigðismálum og  félagsmálum og ég mun berjast fyrir þessum málaflokkum,“ segir Mímir. 

Aðspurður um hvort norski olíusjóðurinn og málefni hans séu á stefnuskrá Rauða flokksins segir Mímir:

„Það er auðvitað ekki hægt að stöðva framleiðslu á olíu á morgun en Noregur þarf á einhverjum tímapunkti að hætta að leggja áherslu á olíuleit og framleiðslu. Það er bara tímaspursmál hvenær það verður,“ segir Mímir. 

Eiríkur Bergmann stjórnmálafræðiprófessor segir úrslitin í Noregi sýna ákveðið óþol eftir langa stjórnarsetu hægri afla.

Eiríkur Bergmann stjórmálafræðiprófessor, Vísir/Vilhelm

„Ég held að þetta séu nú bara einfaldar flekahreyfingar. Hægri stjórnin hefur verið lengi við völd, sumir hafa sagt að hún sé all verulega til hægri. Nútíminn er bara þannig að stjórnmálin sveiflast meira en áður.  Þannig að það var komið ákveðið óþol í garð ríkjandi stjórnvalda. Það er grunnurinn í þessu en svo má auðvitað týna til fjölmörg mál eins og umhverfismál sem hafa verið að koma mikið inn.  Efnahagsmál eru að koma inn sem sterkari átakalína en oft áður. Þá hefur faraldurinn komið sterkt inn eins og alls staðar annars staðar,“ segir Eiríkur. 

Svar Eiríks er eindregið þegar hann er spurður um hvort þetta gefi einhverjar vísbendingar um hvernig fer hér á landi þann 25. september: 

„Nei.“


Tengdar fréttir

Sólin gæti sest á forsætisráðherratíð Solberg

Skoðanakannanir benda til þess að dagar Ernu Solberg sem forsætisráðherra Noregs gætu verið taldir. Norðmenn gengu að kjörborðinu í dag en loftslagsbreytingar og ójöfnuður í samfélaginu hafa verið efst á baugi í kosningabaráttunni.

Sigurreifur Gahr Støre: „Við getum loksins sagt að okkur tókst það“

Jonas Gahr Støre, formaður norska Verkamannaflokksins, var sigurreifur er hann ávarpaði flokksmenn sína eftir að ljóst var að vinstri blokkin í norskum stjórnmálum hafði unnið sigur í norsku þingkosningunum í kvöld. Erna Solberg forsætisráðherra og formaður Íhaldsflokksins hefur viðurkennt ósigur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.