Fundu mann sem var í stúkunni í síðasta leik Brentford í efstu deild fyrir 74 árum

Burridge er nú 88 ára gamall en hann var í stúkunni þegar Brentford spilaði fyrst í deild þeirra bestu fyrir 74 árum síðan. Hann ætlar að mæta á leikinn í kvöld.

Leikurinn sem um ræðir var naumt tap á heimavelli á móti Arsenal 26. maí 1947 en mótherjarnir í fyrsta leiknum í allan þennan tíma eru einmitt Arsenal menn.

Svo skemmtilega vill til að Derek ólst upp í húsi númer 69 á Lionel Road en Brentford byggði nýja heimavöllinn sinn á hinum enda götunnar. Þetta verður annað tímabil Brentford á hinum sautján þúsund manna Brentford Community leikvangi en félagið lék á Griffin Park frá 1904 til 2020.

Guardian fann hinn næstum níræða Burridge og ræddi við hann um Brentford og bæði gömlu og nýju tímana. Það má nálgast viðtalið við hann hér.

„Ég sé ekki hvernig er hægt að styðja tvö félög, allavega ekki almennilega. Það hefur alltaf verið eitt félag hjá mér. Ég hef notið þess sama hvernig hefur gengið. Ef þú styður félag þá styður þú það í gegnum súrt og sætt. Það verður hluti af þínu lífi. Ekki þannig: Ég ætla að hætta að styðja liðið mitt af því að það er búið að tapa svo mörgum leikjum. Það er einn af hápunktum lífsins að vera Brentford maður í gegn,“ sagði Derek Burridge við blaðamann Guardian.

En hvernig líst honum á fyrsta tímabilið í efstu deild í allan þennan tíma? „Ég held að við endum um miðja töflu. Ég held að við getum alveg spilað í þessari deild og ég hlakka mikið til,“ sagði Derek sem hefur verið stuðningsmaður Brentford liðsins í 78 ár. Geri aðrir betur.