Umfjöllun og viðtöl: HK - Valur 0-3| Valsmenn styrktu stöðu sína á toppnum

Andri Már Eggertsson skrifar
Valur - Dinamo Zagreb. Meistaradeild Evrópu karlar. Sumar 2021. Fótbolti, knattspyrna.
Valur - Dinamo Zagreb. Meistaradeild Evrópu karlar. Sumar 2021. Fótbolti, knattspyrna. Bára Dröfn Kristinsdóttir

Valur komst yfir rétt áður en flautað var til hálfleiks. Það má segja að mark Patrick Pedersen hafi verið gegn gangi leiksins en eftir að Valur komst á bragðið áttu heimamenn lítinn séns.

Birkir Már Sævarsson gerði annað mark Vals með laglegu skoti í fjærhornið þegar síðari hálfleikur var ný farinn af stað.

Andri Adolphsson var nýkominn inn á sem varamaður þegar hann spólaði upp hægri kantinn og þrumaði boltanum í slánna og inn.

Leikurinn fór rólega af stað. Fyrsta korterið var tíðinda lítið þar sem bæði lið voru að finna sinn takt í Kórnum.

Um miðjan fyrri hálfleik tók við góður kafli HK þar sem það var með hreinum ólíkindum að HK hafi ekki skorað hið minnsta mark.

Hannes varði skalla frá Stefáni Ljubicic af stuttu færi og skömmu síðar fékk Birnir Snær Ingason tvö góð færi til að koma HK yfir.

Eftir stangarskot Birnirs datt leikurinn heldur mikið niður og var lítið sem ekkert um ógnanir á síðasta þriðjungi á báðum endum vallarins.

Patrick Pedersen kom Völsurum síðan yfir með marki skömmu fyrir hálfleik. Birnir Snær tapaði boltanum sem opnaði vörn HK upp á gátt þar sem Kristinn Freyr kom boltanum á Patrick Pedersen sem fékk góðan tíma á boltann og gerði fyrsta mark leiksins.

Valsmenn komu af miklum krafti inn í síðari hálfleikinn og ekki leið á löngu þar til þeir voru búnir að bæta við öðru marki. Birkir Heimisson átti góða sendingu beint í svæði þar sem Birkir Már Sævarsson tók boltann í fyrsta og smellti honum í fjær hornið.

Andri Adolphsson var nýkominn inn á sem varamaður þegar hann spólaði upp hægri kantinn og þrumaði boltanum í slánna og inn.

Niðurstaðan því 0-3 sigur Vals sem hafði tapað fjórum síðustu leikjum sínum. 

Af hverju vann Valur?

Valur spilaði heilt yfir betur en HK í kvöld. Fyrsta markið rétt fyrir hálfleik breytti gangi leiksins Val í mikinn hag þar sem þeir mættu talsvert betri inn í síðari hálfleikinn og gengu frá leiknum með tveimur góðum mörkum.

Hverjir stóðu upp úr?

Birkir Már Sævarsson átti skínandi leik í kvöld. Hann ógnaði mikið á hægri kantinnum og skoraði mjög huggulegt mark þar sem hann tók boltann viðstöðulaust og þrumaði í fjærhornið.

Hannes Þór Halldórsson stóð vaktina vel í kvöld, hann varði vel þegar HK fengu sín færi til að gera fyrsta mark leiksins og var heilt yfir góður þegar á reyndi. 

Hvað gekk illa?

HK voru í miklum vandræðum með áætlunarferðir Vals upp hægri kantinn, það setti heimamenn í mikil vandræði sem skilaði sér í tveimur mörkum hjá Val. 

Það var með ólíkindum að HK hafði ekki skorað í fyrri hálfleik þar sem þeir fengu urmul af færum til að gera fyrsta mark leiksins.

Hvað gerist næst?

HK fer næst í Kaplakrika þar sem þeir mæta FH 4. ágúst klukkan 19:15.

Valsmenn fara næst til Noregs þar sem þeir mæta Bodo/Glimt í síðari leiknum í Sambandsdeildinni næstkomandi fimmtudag.

Brynjar Björn: Hendum þessum leik í ruslið og höldum áfram 

Brynjar Björn Gunnarsson var svekktur eftir leik.VÍSIR/HULDA MARGRÉT

Brynjar Björn Gunnarsson þjálfari HK var afar svekktur með tap kvöldsins.

„Leikurinn var galopinn þegar haldið var til hálfleiks. Við vorum betri í fyrri hálfleik, við spiluðum vel og var ég ánægður með spilamennsku liðsins," sagði Brynjar Björn

Brynjar Björn var svekktur með síðari hálfleik liðsins sem fengu á sig tvö mörk.

„Það var erfiðara að elta marki undir, það opnaðist ekki mikið hjá okkur en nóg til að Birkir Már skoraði flott mark og þá var þetta mjög erfitt."

„Við fengum fína möguleika til að minnka leikinn í eitt mark en við nýttum þann glugga ekki. Ég er heilt yfir fúll með úrslitin en sáttur með spilamennskuna." 

HK er í næst neðsta sæti deildarinnar verandi búnir að safna sér aðeins tíu stigum og eru í kröppum dansi um að halda sæti sínu í deildinni.

„Það er góð stemmning hjá okkur, við erum með góða liðsheild og eina ráðið sem ég gef strákunum er að sópa þessum leik í ruslið og halda áfram."

HK er í leit að styrkingu áður en leikmannaglugginn lokar en þó er ekki víst að liðið muni takast að bæta við leikmanni.

„Við erum að kíkja í kringum okkur, markaðurinn er erfiður. Covid reglur gera það að verkum að það er erfitt að fá leikmenn að utan, við erum þó að skoða það en ég á ekki von á því," sagði Brynjar Björn að lokum.

 

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.