Golf

Segir að DeCham­beau sé mart­raðar­við­skipta­vinur og líkir honum við frekt barn

Ingvi Þór Sæmundsson skrifar
Fátt gekk upp hjá Bryson DeChambeau á fyrsta degi Opna breska meistaramótsins.
Fátt gekk upp hjá Bryson DeChambeau á fyrsta degi Opna breska meistaramótsins. getty/Keyur Khamar

Starfsmenn golfkylfuframleiðandans Cobra segja að Bryson DeChambeau sé martraðarviðskiptavinur og líkja honum við frekt barn eftir að hann sagði að sérhannaður dræver hans frá fyrirtækinu væri ömurlegur.

DeChambeau náði sér ekki á strik á fyrsta hring Opna breska meistaramótsins í golfi og gekk sérstaklega illa að hitta flatirnar.

Bandaríkjamaðurinn ákvað að kenna drævernum sínum, sem Cobra sérhannaði fyrir hann, um og sagði að hann væri ömurlegur.

Ummæli DeChambeaus fóru illa í æðstu presta hjá Cobra sem svöruðu fyrir sig og spöruðu ekki stóru orðin.

„Það er mjög sárt þegar hann segir eitthvað svona heimskulegt. Hann hefur í raun aldrei verið ánægður. Það er mjög sjaldgæft að hann sé ánægður. Allir gera allt fyrir hann,“ sagði Ben Schomin, starfsmaður Cobra.

„Þetta er eins og þegar átta ára gamall krakki fer í fýlu við þig. Hann segist kannski hata þig en dregur það svo til baka þegar þú spyrð hann af hverju hann hafi sagt það og segist hann ekki hafa meint það.“

Það var svo nákvæmlega það sem gerðist en DeChambeau baðst afsökunar á ummælum sínum. Hann sagðist hafa hlaupið á sig og að hann hefði verið ömurlegur í gær, ekki kylfan.

DeChambeau lék fyrsta hringinn á Opna breska á einu höggi yfir pari og er í 73. sæti mótsins. Suður-Afríkumaðurinn Louis Oosthuzien er með forystu en hann lék fyrsta hringinn á sex höggum undir pari.

Fylgjast má með Opna breska í beinni útsendingu á Stöð 2 Golf.


Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.