Lífið

Efnafræðikennari og tannlæknir skoðuðu gosið í risaeðlubúningum

Ása Ninna Pétursdóttir skrifar
Félagarnir Benjamín og Sindri klæddu sig upp sem risaeðlur á gosstöðvunum á dögunum. 
Félagarnir Benjamín og Sindri klæddu sig upp sem risaeðlur á gosstöðvunum á dögunum. 

„Við höfðum sérð myndir af einhverju fólki í risaeðlubúning á gosstöðvunum og okkur fannst það svo fyndið. Ég átti risaeðlubúning sjálfur og vinur minn fékk lánaðan, við ákváðum að skella okkur bara til að hafa gaman og gera okkur dagamun,“ segir Benjamín Ragnar Sveinbjörnsson í samtali við Vísi.

Benjamín og vinur hans Sindri Davíðsson lögðu leið sína að gosstöðvunum á dögunum eins og svo margir landsmenn. Ætla mætti að flestir hafi með sér nesti meðferðis í bakpokanum en þeir félagar ákváðu að taka með sér búning, risaeðlubúning.

Vinirnir vöktu mikla athygli við gosið.

Ég á sjálfur nokkra búninga en þegar ég var að kenna í Bandaríkjum og það var Hrekkjavaka þá var ég oft að kenna í mismunandi búningum. Eitt árið var það risaeðlubúningur.

Benjamín segir þá félaga ekki hafa lagt í það að labba alla leið að gosinu í búningnum en ákveðið að klæðast þeim við gosstöðvarnar og áleiðis til baka. Eins og ætla mætti vöktu risaeðlurnar tvær mikla athygli fólks á gosstöðvunum.

Skemmtilegt uppátæki!

„Það voru alveg nokkrir sem báðu um að fá mynd af okkur og líka að taka mynd með okkur. Sumir krakkar voru kannski örlítið smeykir fyrst en svo þegar foreldrar þeirra nálguðust okkur var spennandi að fá mynd.“

Fréttablaðið sagði í morgun frá ferðamanni sem hafi dansað við eldgosið í risaeðlubúning og vakið athygli viðstaddra. Þykir líklegt að risaeðlan sem um ræðir sé hugsanlega Benjamín eða Sindri en kannski fengu fleiri sömu hugmynd. 

Benjamín Ragnar starfar sem efnafræðikennari við Háskóla Íslands og Sindri sem tannlæknir. Aðspurður hvort að von væri á fleiri búningaferðum hjá þeim félögum hlær Benjamín og svarar;

Mögulega! Það er aldrei að vita hvert við förum næst og í hvaða búning. Það er alltaf gaman að gera sér dagamun.



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.