Lífið

Skyndihjálpamaður ársins syngur eitt vinsælasta lag sumarsins

Sylvía Rut Sigfúsdóttir skrifar
Sólveig Ásgeirsdóttir söngkona á eitt af vinsælustu lögum sumarsins.
Sólveig Ásgeirsdóttir söngkona á eitt af vinsælustu lögum sumarsins. Aðsent

Sumarsmellurinn Sumardans hefur farið mikinn á útvarpsstöðvum landsins undanfarnar vikur og situr meðal annars í tíunda sæti á vinsældarlista Bylgjunnar en listinn er gefinn út vikulega.

Söngkonan í Poppvélinni sem sendi lagið frá sér á dögunum er Sólveig Ásgeirsdóttir. Sólveig er efnileg söngkona og ber einnig titilinn skyndihjálpamaður ársins 2020 eftir að hún bjargaði lífi vinkonu sinnar á síðasta ári.

Sólveig er ung og lítið þekkt söngkona hér á landi. Hún hefur búið og sungið mikið erlendis undanfarin ár, nú síðast hjá Sunwing entertainment þar sem hún ferðaðist á milli Sunwing hótela við Miðjarðarhafið með söngflokki. 

Poppvélin með fleiri lög í smíðum

„Örlygur Smári bauð mér í stúdíó til að prufa að syngja eftir að hafa heyrt í mér á starfsdegi í Origo þar sem við bæði vinnum. Eftir það hitti ég þá báða, Ögga og Valla, og þeir vildu fá mig með sér í hljómsveit og fyrsta lagið heppnaðist svona vel,“ segir Sólveig um hvernig samstarfið bar að.

„Við erum með nokkur lög í smíðum núna svo það er von á nýju lagi seinna í sumar. Við erum svo að prufa okkur áfram með það hvernig við munum flytja tónlistina á sviði og verðum til dæmis á Hríseyjarhátíð á útisviðinu eftir tvær vikur,“ segir Sólveig. 

Hljómsveitin Poppvélin.Aðsent

Hvetur alla til að fara á námskeið

Sólveig var valin skyndihjálpamaður ársins fyrir að bjarga vinkonu sinni með snöggum viðbrögðum í erfiðum aðstæðum.

„Súsanna Helgadóttir vinkona mín fór í skyndilegt hjartastopp í júlí í fyrra og ég var sem betur fer búin með nokkur skyndihjálpanámskeið og núbúin með upprifjunarnámskeið,“ segir Sólveig um ástæðu þess að hún var valin skyndihjálparmaður ársins. 

Eing og fjallað var um hér á Vísi, hneig Súsanna niður þegar þær vinkonurnar voru í miðju spjalli. Súsanna fór í skyndilegt hjartastopp á heimili sínu um kvöld þegar Sólveig var þar í heimsókn en tveggja ára sonur Súsönnu lá sofandi í herbergi sínu þegar atvikið varð.

Sólveig var fljót að átta sig á að eitthvað alvarlegt amaði að vinkonu sinni og hringdi strax í 112. Á þessum tímapunkti var Súsanna ekki með púls, hætt að anda og orðin blá í framan. Með aðstoð neyðarvarðar 112 hóf Sólveig endurlífgun og hnoðaði Súsönnu og blés þangað til sjúkraflutningamenn komu á staðinn. Það kom í ljós að hún var með leyndan hjartagalla og fékk því bjargráð og dvaldi í tvær vikur á sjúkrahúsi. 

Sólveig Ásgeirsdóttir (t.v.) bjargaði lífi Súsönnu Helgadóttur (t.h.) í júlí síðastliðnum.Vísir/Sigurjón

„Hún skyndilega missti meðvitund og ég hringdi strax á neyðarlínuna og neyðarlínustarfsmaður hjálpaði mér í gegnum endurlífgunina. Hún var svo flutt með skjúkrabíl og allt endaði sem betur fer vel. Ég er mjög þakklát fyrir að hafa farið á þessi skyndihjálpanámskeið og vil hvetja alla til að fara á slík námsskeið og halda þekkingunni við,“ segir Sólveig um þessa reynslu sína. 

Lagið Sumardans má heyra í spilaranum hér fyrir neðan. 


Tengdar fréttir

Draumur fyrir mann sem komst aldrei í landslið í íþróttum

Enginn íslenskur lagahöfundur hefur komist jafn oft í úrslitakeppni Eurovision og Örlygur Smári en hann hefur eins og margir vita samið fjögur framlög Íslands í Eurovision keppninna. Örlygur Smári gaf svo á dögunum út nýtt lag sem heitir Sumardans.

Hneig niður í hjartastoppi þar sem þær sátu og spjölluðu

Sólveig Ásgeirsdóttir bjargaði lífi bestu vinkonu sinnar, Súsönnu Helgadóttur, í júlí síðastliðnum þegar Súsanna fór í skyndilegt hjartastopp á heimili sínu. Tveggja ára sonur Súsönnu lá sofandi í herbergi sínu þegar atvikið varð. Sólveig var í dag útnefnd skyndihjálparmaður ársins 2020.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.