Innlent

Hvar er seinni sprauta af Astra Zeneca?

Jakob Bjarnar skrifar
Björn Ingi á uppýsingafundi almannavarnadeildar ríkislögreglustjóra, embættis landlæknis og sóttvarnarlæknis. Þegar Björn Ing skilur hvorki upp né niður í gangi mála, hver gerir það þá?
Björn Ingi á uppýsingafundi almannavarnadeildar ríkislögreglustjóra, embættis landlæknis og sóttvarnarlæknis. Þegar Björn Ing skilur hvorki upp né niður í gangi mála, hver gerir það þá? vísir/vilhelm

Björn Ingi Hrafnsson ritstjóri, einn helsti sérfræðingur þjóðarinnar í Covid-19 og sóttvörnum vegna kórónuveirunnar, veltir fyrir sér hvað dvelji Orminn langa: Seinni sprautuna af Astra Zeneca.

„Maður var ekkert allt of hress með það á sínum tíma að fá boð í bólusetningu með Astra Zeneca vegna margvíslegra frétta utan úr heimi um aukaverkanir, auk þess sem ýmis lönd viðurkenna ekki bóluefnið og langur tími líður milli fyrsta og annars skammts borið saman við önnur efni,“ skrifar Björn Ingi á Facebooksíðu sína.

Björn Ingi er þekktur fyrir það að hafa tekið heimsfaraldurinn föstum tökum allt frá því að kórónuveirunnar varð fyrst vart. Hann hefur mætt samviskusamlega á nánast hvern einasta upplýsingafund sóttvarnaryfirvalda til að spyrja gagnrýninna og flytja fréttir á vef sínum Viljanum. Auk þess sem hann hefur sent frá sér bók um efnið þar sem hann ræddi meðal annars við þrenninguna Þórólf Guðnason sóttvarnalækni, Ölmu Möller landlækni og Víði Reynisson hjá almannavarnadeild ríkislögreglustjóra.

Þeir síðustu munu verða fyrstir

Björn Ingi heldur áfram að viðra áhyggjur sínar, segir Astra Zeneca líklega sísta kostinn sem í boði var.

„En maður treysti Þórólfi og hans fólki og fór, enda mikilvægi bólusetningar gríðarlegt til að verjast heimsfaraldri. Skýrt var tekið fram að þeir sem ekki myndu þiggja AZ færu aftast í röðina. Það er þess vegna svolítið fúlt að fæst af þessu hafi gengið eftir.“

Björn Ingi segir reyndina hafa verið þá að þeir sem ekki mættu til að fá sprautu í Aztra Zeneca fóru ekki aftast í neina röð heldur eru þeir fyrir löngu komnir með annað bóluefni og jafnvel fullbólusettir.

„En við erum mörg enn að bíða eftir seinni skammtinum og nú var enn verið að fresta honum þar sem AZ skilar ekki umsömdu magni hingað til lands. Og enn á eftir að koma í ljós hvort t.d. Bandaríkjamenn viðurkenna bólusetningu þeirra sem fengu AZ og hleypa þeim inn í landið.“

Flestir aðrir fullbólusettir

Pistill Björns Inga vekur nokkrar umræður. Egill Helgason sjónvarpsmaður, sem hefur verið afar áhugasamur um faraldurinn og kynnt sér hann ítarlega segir mikla umræðu um það í Kanada að best sé að blanda saman; „fá Pfizer eða Moderna sem seinni skammt eftir Astra. Kanadamenn hafa dælt út miklu af Astra.“

Óskar Steinar Jónsson, sem starfar hjá ABC barnahjálp, leggur einnig orð í belg og segist sjálfur hafa fengið Astra Zeneca og hafi fengið sömu upplýsingar, að ef hann neitaði væri hann heppinn að fá eitthvað annað seint á árinu. „Núna eru allir hinir í fjölskyldunni löngu full bólusettir en nei enn verið að bíða eftir Astra. Pirrandi.“


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.