Innlent

Inga Sæland segist glöð auglýsa á Facebook

Jakob Bjarnar skrifar
Inga Sæland segir að sér sé alveg sama hver á Facebook, hún eigi engan fjölmiðil, og gefur lítið fyrir meint tal um að hún sé að mylja undir auðugasta mann heims.
Inga Sæland segir að sér sé alveg sama hver á Facebook, hún eigi engan fjölmiðil, og gefur lítið fyrir meint tal um að hún sé að mylja undir auðugasta mann heims. vísir/vilhelm/getty

Formaður Flokks fólksins, hélt þrumuræðu yfir stuðningsmönnum sínum á 17. júní hátíð flokksins.

Inga fór úr einu í annað í ræðu sinni, sagði að það væri fyrir tilstuðlan Flokks fólksins að „fátæktin væri komin á koppinn“; að aðrir flokkar væru komnir með það mál á dagskrá. Þó lítið hafi miðað í að útrýma fátæktinni. Enda Ísland gengsýrt af spillingu og í landinu byggju tvær þjóðir. „Öðru megin sitja á bakkanum sitja þeir sem allt eiga meðan á hinum sitja þeir sem eiga ekki neitt. Og þurfa að þiggja mylsnuna af alsnægtarborðum auðvaldsins. Þeirra sem hafa söðlað um sig eigurnar okkar, alla fjársjóðina okkar, auðlindina okkar og svo aftur við hin.“

Þá vatt Inga kvæði sínu í kross og sneri sér fyrirvaralaust að máli sem Vísir hefur verið með til umfjöllunar að undanförnu sem eru auglýsingar stjórnmálaflokka á samfélagsmiðlum. Flokkur fólksins hefur varið 1,4 milljónum króna á undanförnum þremur mánuðum í auglýsingar á Facebook.

Flokkarnir hafa sótt sér verulegar upphæðir í sameiginlega sjóði til reksturs, eða tæpa þrjá milljarða á kjörtímabilinu og hluta þess fjár hafa sumir þeirra notað til auglýsingakaupa á samfélagsmiðlum. Það hefur meðal annars formaður Blaðamannafélags Íslands, Sigríður Dögg Auðunsdóttir, gagnrýnt; þetta veiki stöðu íslenskra fjölmiðla og grafi undan þeim.

Röfl að Inga Sæland sé að mylja undir auðugasta mann heims

En Inga gefur lítið fyrir slík sjónarmið og gerir engan sérstakan greinarmun á Facebook og íslenskum fjölmiðlum.

„Það er ánægjulegt að eftir því skuli vera tekið að við skulum auglýsa á Facebook. Ég gæti ekki verið glaðari. 

Og þegar einhver röflar yfir því að Inga Sæland sé að mylja undir auðugasta mann í heiminum með því að auglýsa á Facebook þá segi ég: Hvað á Flokkur fólksins að gera sem ekki á fjölmiðil? 

Hvað eigum við að gera til að vekja athygli á okkar baráttu?“

Og Inga sagðist auglýsa á Facebook af mikilli gleði:

„Auðvitað ber okkur skylda til þess að velja ódýrustu og skilvirkustu leiðina. Og mér gæti ekki verið meira á sama hver á Facebook! Ef við náum augum og eyrum þeirra sem við viljum tala við í gegnum þann miðil þá gerum við það með mikilli gleði.“

Sakar Ríkissjónvarpið um þöggun

Inga hélt áfram að útskýra fyrir sínu fólki hvernig í þessu liggur, út frá hennar bæjardyrum séð:

„Þannig að þegar einhver segir að við séum að auglýsa allt of mikið þá segi ég að við séum þögguð af öðrum fjölmiðlum. Við fengum tvö prósent af allri dagskrá þingmanna á Ríkissjónvarpinu og útvarpinu. Hugsið ykkur. Tvö prósent! Ætli 1,8 prósent hafi ekki verið út af dóna-Klausturmálinu. Restin út af málefnum okkar.“

Inga sagði að málin sem Flokkur fólksins væri að vinna að væru málin sem skiptu máli. Og hún notaði tækifærið og sendi Gunnari Smára Egilssyni, helsta talsmanni Sósíalistaflokksins, pillu:

„Og þegar koma allskonar lukkuriddarar sem þykjast ætla að gera eitthvað annað, hvort sem þeir kalla sig kommúnista eða hvað eina annað, þá á ekki að hlusta á þá! Því það er ekkert að marka þá. Ekki nokkurn skapaðan hæfilegan hlut.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.