Uppbygging hótelsins hefur verið samþykkt í deiliskipulagi Skaftárhrepps en landeigandi á næstu jörð segjast hafa efasemdir um umhverfisáhrif framkvæmdanna. Sá er atvinnumálafulltrúi hjá sveitarfélaginu.
Mál til skoðunar hjá lögreglu
Hreiðar Hermannsson er landeigandi jarðarinnar Orrustustaða austan Kirkjubæjarklausturs, um þrjú þúsund hektara jarðar sem lá í eyði áður en hann keypti hana árið 2013. Þar er hann byrjaður á sex milljarða króna framkvæmdum við hótel og ferðaþjónustusvæði.
Hann segir að nágrannar sínir, eigendur jarðarinnar Hraunbóls, hafi ítrekað reynt að tefja framkvæmdirnar, með þokkalegum árangri því þær eru langt á eftir áætlun. Þeir hafi meðal annars grafið veg í sundur sem verktakar á vegum Hreiðars hafa notað til að komast að Orustustöðum, komið upp girðingum þvert yfir veginn og lagt bíl á hann miðjan til að hefta umferð að jörðinni.
Nágranni Hreiðars, eigandi Hraunbóls, er atvinnumálafulltrúi Skaftárhrepps, Þuríður Helga Benediktsdóttir. Hreiðari þykir það skjóta skökku við að atvinnumálafulltrúi sveitarfélagsins reyni að koma í veg fyrir uppbyggingu á hótelinu, sem yrði stærsti vinnustaður sveitarfélagsins.
Lögmaður Hreiðars segir í samtali við Vísi að allavega tvö mál séu til skoðunar hjá lögreglunni á Suðurlandi vegna skemmda á veginum, sem þeir telja víst að nágrannarnir hafi unnið.
Ríkið hefur veitt leyfi fyrir veginum
Umræddur vegur liggur frá þjóðveginum að Orustustöðum. Hann fer þó fyrst í gegn um landskika sem er í sameiginlegri eigu jarðanna Hraunbóls og Sléttabóls. Sléttaból er í eigu ríkisins.
Hreiðar segir að skemmdir og lokanir á veginum hafi landeigendur Hraunbóls allar unnið í þessu sameiginlega landi þeirra og Sléttabóls. Lögfræðingur Hreiðars segir við Vísi að menn megi ekki vinna skemmdir á vegum í alfaraleið þó þeir liggi í landi þeirra. „Það er alveg ljóst að það má ekki enda hefur lögregla haft afskipti af þessu nokkrum sinnum,“ segir hann.
Sveitarfélagið Skaftárhreppur hefur samþykkt deiliskipulag þar sem gert er ráð fyrir hóteluppbyggingunni. Þá hefur einnig verið samþykkt að leggja betri veg, sem þolir alla þungaumferð, að Orustustöðum. Hann þarf líka að fara í gegn um sameiginlegt land Hraunbóls og Sléttabóls. Ríkið, sem á Sléttaból, hefur þegar samþykkt að vegurinn verði lagður í gegn um landið en eigendur Hraunbóls ekki.
Eigendur Hraunbóls hafa kært ýmsar ákvarðanir sveitarstjórnarinnar um að samþykkja bæði deiliskipulagið og veita framkvæmdaleyfi fyrir ýmsu í ferlinu.
Vísir ræddi við atvinnufulltrúann og landeigandann Þuríði Helgu um málið í dag. Hún vildi ekki tjá sig mikið um það en vísaði á lögfræðing sinn, sem ekki náðist í við gerð fréttarinnar. „Það verður mál í þessu dómtekið í næstu viku og ég held ég eigi ekki að vera að tjá mig um það núna,“ sagði hún.
Aðspurð hvort hún hafi unnið skemmdir á umræddum vegi kvaðst hún ekki vilja tjá sig um það en kom sjónarmiði sínu á framfæri um að Hreiðar væri að ryðjast inn á hennar einkaveg.
Flutningafyrirtæki hafði samband við lögreglu
Flutningafyrirtækið Auðbert og Vigfús hefur séð um að flytja efni og annað á Orustustaði fyrir Hermann.
Fyritækið tilkynnti það nýlega til lögreglu að slá hafði verið skrúfuð milli tveggja staura í um tveggja metra hæð þvert yfir veginn. Í samtali við Vísi segir Vigfús, annar eigandi fyrirtækisins, að það sé stórhættulegt að koma fyrir slá í ólöglegri hæð þvert yfir veg – hún hefði getað valdið alvarlegu slysi.
„Við tilkynntum það til lögreglu, já. Svo talaði ég við landeigendurna sem gerðu þetta og gerði þeim grein fyrir því hve alvarlegt þetta var. Þau útlistuðu þá fyrir mér sína hlið á málinu sem var þannig að þetta væri ekki vegur til þessara nota,“ segir Vigfús.
Ætluðu að opna á næsta ári
Stöð 2 fjallaði um framkvæmdir Hreiðars á hótelinu síðasta sumar. Hann er eigandi Stracta Hótels á Hellu og hyggst byggja annað hótel á jörðinni Orustustöðum. Þar vill hann þá bjóða upp á fjölbreytta afþreyingarþjónustu á þrjú þúsund hektara landsvæðinu; vera með vatnagarða, bjóða upp á hestamennsku, gönguferðir og stangveiði.
„Þetta er allt hugsað þannig að sem minnst vélknúið yrði hér. Í vatnagörðunum yrðu bara kajakar og bátar sem gengu ekki fyrir vél og á landinu yrði bara umferð rafmagnsfjórhjóla og rafmagnsbíla,“ segir Hreiðar við Vísi.
Segir rétta tímann núna til að reisa sex milljarða sveitahótel - Vísir (visir.is)
Hann segir að upprunalega hafi staðið til að opna hótelið árið 2022. Ljóst er að ekki verður úr því.
„Þeim á Hraunbóli hefur tekist að tefja þetta alveg. Ég held að ég sé ekki búinn með nema svona tíu prósent af framkvæmdinni,“ segir hann. Þó séu búið að klára helstu grunnatriði áður en öll bygging húsnæðisins hefst.
„Þau hafa tafið þetta svakalega. Því ég er með erlenda fjárfesta úti og svona og þetta fælir menn auðvitað frá verkefninu að vita af endalausum kærum fram og til baka. Og að það sé atvinnumálafulltrúi sveitarfélagsins sem reynir að koma í veg fyrir atvinnuuppbyggingu og tefja framkvæmdir sem sveitarfélagið vill að verði finnst mér alveg óskiljanlegt.“
