Lífið

„Notaðu þennan tíma til að tengjast barninu“

Sylvía Rut Sigfúsdóttir skrifar
Björn Grétar Baldursson, Jenný Lára Arnórsdóttir, Jökull Logi.og Iðunn Blær.
Björn Grétar Baldursson, Jenný Lára Arnórsdóttir, Jökull Logi.og Iðunn Blær. Aðsent

Björn Grétar Baldursson trúði því að hann gæti ekki gert mikið gagn fyrstu mánuðina í föðurhlutverkinu. Í dag segist hann vita að það sé kjaftæði og hvetur foreldra í þeirri stöðu til að nýta öll tækifæri til tengslamyndunar.

Björn segir að hann upplifi eftirsjá í dag, yfir því hvernig hugarfarið hans var fyrst eftir að sonur hans kom í heiminn. Drengurinn er fjögurra ára í dag.

„Ég gaf honum ekki þann tíma. Ég var með núll þolinmæði,“ útskýrir Björn. „Ég þarf reglulega að minna mig á þetta, því þolinmæði er grundvallaratriði í uppeldi barna.“

Hann segir oft við mig þegar ég er illa sofinn og illa stemmdur, pabbi ekki nota reiðu röddina.

„Ég geri mér ekki einu sinni grein fyrir því að ég sé að nota hana.“

Bara kjaftæði

Björn og Jenný eignuðust annað barn fyrir sjö mánuðum og hann upplifir foreldrahlutverkið allt öðruvísi í þetta skiptið enda með breytt hugarfar sjálfur.

„Mér finnst leiðinlegt að hafa ekki verið þetta fyrir hann alltaf,“ útskýrir Björn.

„Mér finnst það næstum því ósanngjarnt að ég er að upplifa mig bæði sem betri föður og ég er að upplifa mig miklu meira sem faðir við hana en gagnvart honum.“

Björn segir að fyrst eftir að hann varð faðir hafi hann haldið að hann gæti ekkert gert neitt gagn til að byrja með.

„Hann er hvort eð er á brjósti, hvað er ég að gera? Ég er bara karlmaður, ég get ekkert gert. Sem er bara kjaftæði.“

Ekki eins og uppvask

Hann ráðleggur hinu foreldrinu að nýta allan tíma sem gefst til tengslamyndunar.

„Ef þú ert aðallega að skipta um bleyjur, taktu þér þá tíma í að skipta um bleyju. Þetta er ekki eins og að vaska upp,“ segir Björn.

„Taktu þér tíma. Notaðu þennan tíma til að tengjast barninu.“

Hægt er að hlusta á þáttinn í heild sinni í spilaranum hér fyrir neðan. Björn og Andrea Eyland þáttastjórnandi Kviknar ræða mikilvægi þess að vera saman í barneign og rauninni sem fylgir því að vera foreldri. Að makar stígi upp og taki ábyrgð.

Klippa: 22 - Björn Grétar

Veit hvað hann er að tala um

Andrea Eyland hefur í gengum Kviknar Instagrammið hvatt foreldra til þess að deila myndum, myndböndum og texta um foreldrahlutverkið og merkja það #raunin. Hún segir að mun færri karlmenn hafi tekið þátt í þeirri umræðu, en Björn var einn af þeim sem sagði frá sinni reynslu.

Björn segir að hann hafi sjálfur ekkert alltaf verið svona opinn um föðurhlutverkið og allt sem því fylgir.

„Mér hefur ekki alltaf fundist þetta auðvelt. Því meiri skilning sem ég hef á þessu og á uppeldi yfir höfuð og gefið mér tíma til að kynna mér málefnið finnst mér ég hafa tilhneigingu til að tjá mig. Ég veit hvað ég er að tala um.“

Björn veltir því fyrir sér hvort að karlar séu hugsanlega ekki búnir að kynna sér efnið og lesa sér til og þori þess vegna ekki að tjá sig á samfélagsmiðlum um þessi mál. Margir karlar séu jafn vel með það hugarfar að það sé ekki í þeirra verkahring að fræða sig um barnauppeldi.

„Konurnar eiga bara að pæla í þessu og lesa um þetta og síðan segja mér hvað ég á að gera. Ég tala nú bara fyrir mig en þetta hefur verið svona hjá mér.“

Nokkrar málsgreinar alveg nóg

Fyrir fjórum árum eignuðust Björn og Jenný eiginkona hans sitt fyrsta barn. Björn viðurkennir að hann hafi þá talið að sitt hlutverk væri bara að halda því á lífi og skipta um bleyjur.

„Ég gerði mér ekki grein fyrir allri annarri vinnu.“

Björn vildi óska þess að hann hefði fyrr áttað sig og byrjað að kynna sér sjálfur allar hliðar foreldrahlutverksins.

„Maður þarf ekkert að lesa fleiri, fleiri kafla á dag. Það eru oft smá málsgreinar sem minna mann á hvernig maður vill tjúna sig inn sem foreldri. Þetta hefur hjálpað mér mikið og maður þarf eiginlega að minna sig á það á hverjum degi.“

Kviknar birtist á Vísi og á öðrum efnisveitum eins og Spotify, Eldri þætti má finna hér. 

Hlaðvarpið Kviknar fjallar um getnað, meðgöngu, fæðingu og sængurlegu. Það fjallar líka um raunina eftir að barnið er komið í heiminn. Eðvarð Egilsson sér um tónlistina í þáttunum en umsjónarkona Kviknar er Andrea Eyland.


Tengdar fréttir

Tíðahringurinn getur haft áhrif á frammistöðu á æfingum

„Ekki nóg með að við séum að ganga í gegnum þessar hormónasveiflur í hverjum mánuði, þá er bara allt lífsskeið okkar, alveg frá því við erum á fósturskeiði og þangað til að við verðum gamlar konur, erum við svo ótrúlega háð þessum breytingum í hormónum í líkamanum okkar,“ segir Hanna Lilja Oddgeirsdóttir sérnámslæknir í kvensjúkdóma- og fæðingarlækningum.

„Forvörn í því að hlúa vel að konum og heilsu kvenna“

Hanna Lilja Oddgeirsdóttir ákvað frekar snemma að hún vildi verða kvensjúkdóma- og fæðingarlæknir. Hún hefur einstaklega mikinn áhuga á kvenheilsu og fræðir nú stúlkur og konur um allt sem tengist því efni, meðal annars með hlaðvarpsþáttum ásamt Andreu Eyland þáttastjórnanda Kviknar hlaðvarpsins hér á Vísi.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.