Fótbolti

Fyrrum varnar­maður Liver­pool ráðinn aðal­þjálfari HB Köge

Runólfur Trausti Þórhallsson skrifar
Lars Jacobsen [t.v.] verður aðstoðarþjálfari Daniel Agger [t.h.] en sá síðarnefndi var í gær ráðinn aðalþjálfari HB Köge í dönsku B-deildinni í knattspyrnu.
Lars Jacobsen [t.v.] verður aðstoðarþjálfari Daniel Agger [t.h.] en sá síðarnefndi var í gær ráðinn aðalþjálfari HB Köge í dönsku B-deildinni í knattspyrnu.

Danski miðvörðurinn Daniel Agger var nokkuð óvænt tilkynntur sem nýr þjálfari danska b-deildarliðsins HB Köge í dag. Agger lagði skóna á hilluna árið 2016 eftir að hafa glímt við meiðsli til fjölda ára. Þetta er hans fyrsta starf í þjálfun.

Unnendur enska boltans muna eflaust eftir Agger frá tíma hans með Liverpool en þar lék hann 232 leiki frá árunum 2006 til 2014. Hann var þekktur fyrir að vera harður í horn að taka, með góðan vinstri fót og fyrir að skarta húðflúrum frá toppi til táar. Agger lék einnig með danska stórveldinu Bröndby á ferlinum ásamt því að leika alls 75 A-landsleiki og skora í þeim 11 mörk.

Agger glímdi lengi vel við erfið meiðsli og lagði á endanum skóna á hilluna árið 2016, þá aðeins 31 árs gamall. Fimm árum síðar er hann orðinn aðalþjálfari HB Köge en það er um leið hans fyrsta starf sem aðalþjálfari.

„Köge er hinn fullkomni staður fyrir mig til að hefja þjálfaraferil minn,“ sagði Agger er hann skrifaði undir. Samningurinn gildir til sumarsins 2024.

„Félagið er með góð gildi og góðan grunn. Ég hlakka til að byrja og ég hlakka til að vera undir pressu á nýjan leik,“ sagði Agger að lokum.

HB Köge endaði í 6. sæti dönsku B-deildarinnar og þó svo að liðið sé nú hluti af þeim sex liðum sem fara í umspil um að komast í úrvalsdeildina er of langt í toppliðin. Köge er með 30 stig eftir 22 leiki en Viborg trónir á toppnum með 56 og þar á eftir kemur Silkeborg með 49 stig.




Fleiri fréttir

Sjá meira


×