Innlent

Ekki ósennilegt að kvika sé nær yfirborði en fyrr í vikunni

Jóhann K. Jóhannsson skrifar
Líklegasta svæðið þar sem eldgos gæti brotist út er við Nátthaga milli Borgarfjalls og Langahryggs.
Líklegasta svæðið þar sem eldgos gæti brotist út er við Nátthaga milli Borgarfjalls og Langahryggs. vísir/vilhelm

Ekki er ósennilegt að kvika sé nær yfirborði en fyrr í vikunni við Fagradalsfjall, þegar hún var á um eins kílómetra dýpi að mati hópstjóra náttúruvár hjá Veðurstofu Íslands. Vonast sé eftir að gervitunglamynd muni varpa skýrari mynd á það um helgina.

Líklegasta svæðið þar sem eldgos gæti brotist upp á yfirborðið er syðst í Fagradalsfjalli við Nátthaga milli Borgarfjalls og Langahryggs. Sterkir jarðskjálftar hafa orðið þar á svæðinu síðan á miðnætti, sá stærsti þeirra 5,0M skömmu fyrir klukkan átta í morgun og fannst hann allt austur á Hvolsvöll og upp í Borgarfjörð. Á fjórða tug þúsunda skjálfta hafa mælst frá því hrinan hófst í lok febrúar.

Nátthagi er á milli Borgarfjalls og Langahryggs við syðsta enda Fagradalsfjalls.Vísir/HÞ

Vísindaráð almannavarna fundaði um stöðuna í hádeginu í dag þar sem farið var yfir þróun virkninnar á svæðinu síðustu daga og þær breytingar sem hafa orðið. Verði gos á þessum slóðum þarf ekki stórt gos til þess að hraun mundi renna yfir Suðurstrandaveg. Kristín Jónsdóttir, hópstjóri náttúruvár segir að í sögulegu samhengi sé ekki líklegt að kvikugangurinn nái út í sjó.

Þannig að það eru ekki líkur á því að það kæmi til öskugos á þessu svæði ef að gosið kæmi upp í sjó?

„Ég ætla ekki að segja að það séu engar líkur en þær eru litlar,“ segir Kristín.

Kristín Jónsdóttir, fagstjóri náttúruvár hjá Veðurstofu Íslands.Vísir/Vilhelm

Skjálftavirknin í morgun hefur verið kröftug sem merki að kvikuflæði sé til staðar í kvikuganginum.

„Og hann er að reyna að búa til pláss og við það þá verða skjálftar en svo sjáum við það síðasta sólarhringinn að þá virðist hann ekki hafa færst framar og er stopp í Nátthaga,“ segir Kristín.

Kristín sagði fyrr í vikunni að kvikan væri á um eins kílómetra dýpt von er á nýrri greiningu um helgina.

„Það koma vonandi gervitunglamyndir um helgina þar sem við getum vonandi áttað okkur betur á því en við erum ekki að sjá nein skýr merki um það í skjálftunum og það er erfitt að átta sig á því í þeim mælingum sem við erum með akkúrat núna en mér finnst það ekkert ósennilegt,“ segir Kristín.

Ákveðið var á fundi ríkisstjórnarinnar í morgun að skipa sérstakan hóp ráðuneytisstjóra sem er ætlað að eiga í nánu samráði við viðeigandi stofnanir til að undirbúa áætlun til að vernda mikilvæga innviði á borð við vatnsból, orkukerfi og fjarskiptakerfi. Mikilvægt sé að hefja þessa vinnu strax þótt ekkert eldgos sé hafið.

Sigurður Ingi Jóhannsson samgöngu- og sveitarstjórnarráðherra.Vísir/Stöð 2

„Það eru bara til varasjóðir og við munum alltaf standa með öllu því sem þarf að gera til þess að tryggja eins og hægt er bæði öryggi fólks og innviða,“ segir Sigurður Ingi Jóhannsson, samgöngu- og sveitarstjórnarráðherra.


Tengdar fréttir

Ó­lík­legt að sprungan nái til sjávar með til­heyrandi ösku­gosi

Ólíklegt er að gossprunga sem opnast suður af Fagradalsfjalli nái til sjávar ef horft er til gossögunnar og jarðfræðirannsókna á svæðinu. Eins og staðan er núna er því ósennilegt að það gjósi neðansjávar með tilheyrandi öskugosi, að sögn vísindaráðs almannavarna.  

Eldgos í sjó möguleiki

Ekkert lát er á snörpum jarðskjálftum á Reykjanesskaga þrátt fyrir að þeim hafi fækkað síðustu daga. Á þriðja tug jarðskjálfta stærri en þrír hafa mælst frá miðnætti. Sú sviðsmynd er til skoðunar að eldgos gæti orðið í sjó.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×