Ekki ósennilegt að kvika sé nær yfirborði en fyrr í vikunni

Líklegasta svæðið þar sem eldgos gæti brotist upp á yfirborðið er syðst í Fagradalsfjalli við Nátthaga milli Borgarfjalls og Langahryggs. Sterkir jarðskjálftar hafa orðið þar á svæðinu síðan á miðnætti, sá stærsti þeirra 5,0M skömmu fyrir klukkan átta í morgun og fannst hann allt austur á Hvolsvöll og upp í Borgarfjörð. Á fjórða tug þúsunda skjálfta hafa mælst frá því hrinan hófst í lok febrúar.

Vísindaráð almannavarna fundaði um stöðuna í hádeginu í dag þar sem farið var yfir þróun virkninnar á svæðinu síðustu daga og þær breytingar sem hafa orðið. Verði gos á þessum slóðum þarf ekki stórt gos til þess að hraun mundi renna yfir Suðurstrandaveg. Kristín Jónsdóttir, hópstjóri náttúruvár segir að í sögulegu samhengi sé ekki líklegt að kvikugangurinn nái út í sjó.

Þannig að það eru ekki líkur á því að það kæmi til öskugos á þessu svæði ef að gosið kæmi upp í sjó?

„Ég ætla ekki að segja að það séu engar líkur en þær eru litlar,“ segir Kristín.

Skjálftavirknin í morgun hefur verið kröftug sem merki að kvikuflæði sé til staðar í kvikuganginum.

„Og hann er að reyna að búa til pláss og við það þá verða skjálftar en svo sjáum við það síðasta sólarhringinn að þá virðist hann ekki hafa færst framar og er stopp í Nátthaga,“ segir Kristín.

Kristín sagði fyrr í vikunni að kvikan væri á um eins kílómetra dýpt von er á nýrri greiningu um helgina.

„Það koma vonandi gervitunglamyndir um helgina þar sem við getum vonandi áttað okkur betur á því en við erum ekki að sjá nein skýr merki um það í skjálftunum og það er erfitt að átta sig á því í þeim mælingum sem við erum með akkúrat núna en mér finnst það ekkert ósennilegt,“ segir Kristín.

Ákveðið var á fundi ríkisstjórnarinnar í morgun að skipa sérstakan hóp ráðuneytisstjóra sem er ætlað að eiga í nánu samráði við viðeigandi stofnanir til að undirbúa áætlun til að vernda mikilvæga innviði á borð við vatnsból, orkukerfi og fjarskiptakerfi. Mikilvægt sé að hefja þessa vinnu strax þótt ekkert eldgos sé hafið.

„Það eru bara til varasjóðir og við munum alltaf standa með öllu því sem þarf að gera til þess að tryggja eins og hægt er bæði öryggi fólks og innviða,“ segir Sigurður Ingi Jóhannsson, samgöngu- og sveitarstjórnarráðherra.