Veður

Lægð færir með sér vaxandi suð­austan­átt og rigningu

Eiður Þór Árnason skrifar
Hægviðri verður víðast hvar í dag.
Hægviðri verður víðast hvar í dag. Vísir/vilhelm

Í dag er útlit fyrir breytilega átt, þrjá til átta metra á sekúndu og bjartviðri en lítilsháttar vætu vestan- og norðvestanlands fram undir hádegi. Þá mun bera á vaxandi suðaustanátt og þykknar upp suðvestanlands seint í kvöld.

Hægviðri verður á landinu í dag og víða léttskýjað, hiti á bilinu núll til sex stig en um frostmark norðaustanlands. Við Hvarf er lægð á leið til landsins og koma skil frá henni að suðvesturhorni landsins í kvöld. Fylgir þeim vaxandi suðaustanátt og rigning en þurrt verður norðaustantil fram á morgundaginn. 

Fram kemur í hugleiðingum veðurfræðings Veðurstofu Íslands að skilin gangi þó nokkuð hratt yfir og í kjölfar þeirra snúist í suðvestanátt sunnan- og vestanlands í fyrramálið með skúrum eða slydduéljum en slyddu eða snjókomu með köflum á Norður- og Austurlandi.

Á morgun er spáð suðaustan tíu til fimmtán metrum á sekúndu og rigningu með köflum sunnan- og vestantil í fyrramálið en hægari vindi og úrkomulaust norðaustanlands. Snýst í suðvestan fimm til þrettán metra á sekúndu eftir hádegi, hiti núll til sex stig að deginum. Dregur úr vindi og kólnar heldur annað kvöld.

Veðurhorfur á landinu næstu daga

Á þriðjudag: Hæg breytileg átt og skýjað með köflum en vaxandi norðanátt síðdegis. Norðan 8-15 og rigning eða slydda á austanverðu landinu um kvöldið en él við norðurströndina. Hiti 0 til 4 stig yfir daginn en frost 0 til 6 stig um kvöldið.

Á miðvikudag: Norðan og norðaustan 8-15 m/s og slydda eða snjókoma en úrkomuminna á Suður og Suðvesturlandi. Lægir og styttir upp austantil síðdegis en hvessir á Vestfjörðum. Hiti 0 til 4 stig syðst annars um og undir frostmarki.

Á fimmtudag: Norðaustlæg átt og slydda eða snjókoma á norðvestanverðu landinu en stöku skúrir syðra. Hægari sunnanátt og lítilsháttar væta á austanverðu landinu en snýst í norðlæga átt þar seinni partinn. Hiti um og yfir frostmarki.

Á föstudag: Útlit fyrir norðaustanátt og kólnandi veður. Él við norður og austurströndina en úrkomulítið í öðrum landshlutum.

Á laugardag: Útlit fyrir áframhaldandi norðaustanátt og éljagang á norðanverðu landinu en bjartviðri syðra. Hiti breytist lítið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.