Fótbolti

Ísak Óli lík­lega á förum frá SønderjyskE

Runólfur Trausti Þórhallsson skrifar
Ísak Óli í leik með U21 landsliði Íslands.
Ísak Óli í leik með U21 landsliði Íslands. Vísir/Bára

Svo virðist sem varnarmaðurinn Ísak Óli Ólafsson sé á förum frá danska úrvalsdeildarfélaginu SønderjyskE áður en langt um líður.

Ísak Óli hefur ekki komið mikið við sögu hjá SønderjyskE á tímabilinu og er hann að hugsa sér til hreyfings. Þetta staðfesti Guðlaugur Tómasson, umboðsmaður leikmannsins, í stuttu spjalli við Fótbolta.net í dag.

„Ísak Óli er búinn að bæta sig mikið hjá SønderjyskE og hefur verið þolinmóður en okkur finnst hann hafa gæðin til að spila þar. Við erum að skoða hans næstu skref núna og þar getur bæði lán og sala komið til greina.“

„Það eru búnar að vera fyrirspurnir frá efstu deildum Noregs og Svíþjóðar, MLS-deildinni í Bandaríkjunum ásamt náttúrulega Íslandi,“ sagði Guðlaugur í viðtalinu og því ljóst að mögulega gæti Ísak Óli leikið í Pepsi Max deildinni hér á landi næsta sumar.

Þessi tvítugi varnamaður hefur aðeins leikið 104 mínútur í dönsku úrvalsdeildinni frá því hann gekk í raðir félagsins árið 2019. Hann lék hins vegar tvo leiki með liðinu í danska bikarnum á síðustu leiktíð sem og einn á þessari. 

Félagið fór alla leið og vann danska bikarinn á síðustu leiktíð og er því ríkjandi bikarmeistari.

Áður en Ísak Óli hélt ytra lék hann hins vegar 65 leiki með uppeldisfélagi sínu Keflavík og þá hefur hann leikið alls 24 leiki fyrir yngri landslið Íslands og skorað í þeim fjögur mörk. Þar af  átta leiki fyrir U21 landsliðið og gæti hann verið í leikmannahópi liðsins sem tekur þátt á lokakeppni EM sem fer fram síðar í þessum mánuði.

Danska félagið situr sem stendur í 7. sæti dönsku úrvalsdeildarinnar með 24 stig að loknum 18 leikjum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.