Bó sagður standa á bak við ofsóknir á hendur Leoncie

Leoncie var í frísklegu útvarpsviðtali við þá Frosta Logason og Þorkel Mána í Harmageddon í morgun og kom víða við. Meðal annars heldur hún því fram að maðurinn á bak við viðvarandi fordóma í sinn garð sé Björgvin Halldórsson.

Leoncie lét vaða á súðum í viðtalinu. Hún kom fram á Keflavík Musik Festival fyrir ári og sagði allt hafa gengið að óskum; allur aðbúnaður hafi verið til fyrirmyndar en talsvert fjaðrafok hefur verið vegna hátíðarinnar núna og eru þeir aðstandendur, Óli Geir og Pálmi Þór, ekki hafa staðið við gerða saminga.

Leoncie segir þetta dæmigerðan væl í ríkisstyrktum tónlistarmönnum. Og spyr, ef þeir séu svona góðir og þeir vilja vera láta af hverju þeir geti þá ekki framfleytt sér sjálfir án ríkisstyrkja. Hvaða bankastjóri sem er myndi henda þeim öfugum út, kæmu þeir á fund bankanna og færu fram á rekstrarlán.

Sögunni víkur þaðan að gengi hljómsveitarinnar Sigur Rósar, sem Leoncie segir svo mikið drasl að hún hreinlega gubbi heyri hún í þeim. Þeir steli öllu steini léttara úr indverskri tónlist. Og geri það illa.

En mestum tíðindum hlýtur að sæta frásögn Leoncie er varðar Björgvin Halldórsson. Hún segir svo frá að Viktor, maður hennar, hafi verið umboðsmaður hennar um hríð. Viktor reyndi að koma Leoncie að á einhverjum af þeim sjö skemmtistöðum sem Ólafur Laufdal átti á sínum tíma. Þar var fyrir Björgvin, skemmtanastjóri Ólafs, og hann ekki bara útilokaði hana með öllu heldur lagði stein í götu hennar við öll tækifæri. Og er í raun upphafsmaður þess rasisma sem hún hefur mátt sæta á Íslandi. Íslenskir tónlistarmenn hafi í raun beitt nytsömum sakleysingjum gegn sér; kynþáttahöturum. Leoncie hefur nú búið á Englandi í átta ár og er ekki á leiðinni til baka, þó íslenskur ríkisborgari sé.

Uppfært 13:30

"Ja, hérna… Björk er vangefinn mongólíti, Sigur Rósar-menn eru þjófar, og ég er rasisti. Verð að játa að félagsskapurinn er góður en lýsingin afleit, og auðvitað röng," segir Björgvin Halldórsson en vill að öðru leyti ekki tjá sig um þessar krassandi ásakanir Leoncie.