Réðust á dyravörð og hótuðu lögreglumönnum

Um klukkan ellefu í gærkvöldi barst lögreglu tilkynning um að ölvað par væri til vandræða við veitingastað í Bankastræti þar sem þau höfðu ráðist á dyravörð. Konunni hafði verið vísað út af veitingastaðnum eftir að hún fór að afklæðast þar inni. Þegar dyraverðir voru að fylgja konunni út sló hún dyravörð og mun maðurinn einnig hafa sparkað í dyravörðinn.

Á vettvangi sló konan einnig lögreglumann með krepptum hnefa í andlitið. Þá fóru þau ekki að fyrirmælum lögreglu og hafði parið í hótunum við lögreglumenn. Hótuðu þau að skaða lögreglumenn og fjölskyldur þeirra. Parið var vistað í fangageymslu fyrir rannsókn máls.

Laust eftir klukkan 2 í nótt var tilkynnt um innbrot í bifreið á bifreiðastæði við Perluna. Þar hafði erlent par verið sofandi í bíleigubílnum sínum þegar þau vakna við að að hliðarrúða er brotin og maður teygir sig í aftursætið og tekur þaðan 600 þúsund króna myndavél í myndavélatösku. Maðurinn settist svo upp í aðra bifreið og ók burt.

Ferðamennirnir fljúga frá Íslandi á laugardag eftir 11 daga ferðalag um Ísland. Myndavélin er ótryggð og þau eru með 350.000kr sjálfsábyrgð á bílaleigubifreiðinni en þeim fannst verst að hafa misst allar ljósmyndirnar úr ferðinni sem voru í myndavélinni.